Խորհրդային հայտնի դերասան, բանաստեղծ եւ երգերի կատարող Վլադիմիր Վիսոցկու վերջին բանաստեղծությունը փարիզյան Drouot աճուրդում վաճառվել է 200 հազար եվրոյով:
Վիսոցկին այդ բանաստեղծությունը գրել է զբոսաշրջային ընկերության փոստային բացիկի վրա: «Եվ ցածում է սառույց, եւ վերեւում: Տարուբերվում եմ արանքում…», — գրել է բանաստեղծը 1980-ի հունիսի 11-ին, մահից մեկ ու կես ամիս առաջ: Լոտի նախնական գինը 10-15 հազար եվրո է եղել, տեղեկացնում է «ՌԻԱ Նովոստին»:
«Ութսուն թվի հուլիսի տասնմեկը: Սպասասրահում ճամպրուկներ են, դու մեկնում ես Մոսկվա: Երկուսիս համար էլ դժվար է ու տխուր: Հոգնել ենք: Երեք շաբաթ մենք արել ենք այն ամենը, ինչ ի վիճակի էինք: Գուցե քաջությունս չհերիքեց: Ամեն ինչ ունայն է: Դու գրպանիցդ փոքրիկ բացիկ ես հանում: Դրա վրա արագ-արագ մի քանի տող ես գրում: Մեծ, աղմկոտ սպասասրահում քո ձայնը հնչում է որպես հուղարկավորության զանգահարություն: Ես անձայն լաց եմ լինում», — հետագայում «Վլադիմիրը կամ Ընդհատված թռիչք» գրքում այսպես էր վերհիշում բանաստեղծության ծնվելու պահը Վիսոցկու այրին` ռուսական ծագումով ֆրանսիացի դերասանուհի եւ երգչուհի Մարինա Վլադին:
Վլադին, որն աճուրդին ներկայացրել էր Վիսոցկու հետ կապված մի քանի լոտ, հեղինակ-կատարողի վերջին կինն է եղել եւ նրա մասին «Վլադիմիրը կամ Ընդհատված թռիչք» հուշերի հեղինակն է: