Ռուսաստանի ԱԳ նախարար Սերգեյ Լավրովն ու ԵՄ արտաքին հարաբերությունների եւ անվտանգության քաղաքական հարցերի գերագույն հանձնակատար Ֆեդերիկա Մոգերինին հեռախոսով քննարկել են Սիրիայում իրավիճակի կարգավորման հեռանկարներն ու ահաբեկչության դեմ պայքարը՝ հաշվի առնելով Սու-24-ի հետ կապված միջադեպը:
ԱԳՆ հաղորդագրության համաձայն, Ֆեդերիկա Մոգերինին ցավակցություն է հայտնել թուրքական ՌՕՈԻ-ի գործողությունների հետեւանքով ռուսական Սու-24-ի կործանման առիթով:
Սիրիայում ռուսական Սու-24 ինքնաթիռը խոցել են Թուրքիայի ռազմաօդային ուժերը: Անձնակազմը հասցրել է դուրս պրծնել օդանավից, սակայն երկու օդաչուներից մեկը ցամաքից արձակված կրակոցից զոհվել է: Երկրորդ օդաչուն ողջ է: Օդաչուների որոնումներին մասնակցած երկու Մի-8 ուղղաթիռներից մեկը կրակահերթի տակ է հայտնվել եւ հարկադիր վայրէջք կատարել: Պայմանագրային զինծառայողներից մեկը զոհվել է, մյուսները՝ տարհանվել:
