Կոտայքի մարզի Գառնի համայնքում 2015թ. հուլիսի 9-ի լույս 10-ի գիշերը ինքնաձիգից ավելի քան 20 կրակոց է արձակվել գյուղապետ Աշոտ Վարդանյանի որդու ավտոմեքենայի ուղղությամբ, զոհեր եւ վիրավորներ չեն եղել: Այս մասին տեղեկանում ենք Ոստիկանությունից:
«Գիշերվա կեսին կրակոցներ լսեցի, որպես համայնքի ղեկավար՝ դուրս եկա, տեսնեմ՝ ինչ կրակոցներ են եղել: Հուշարձանի մոտ տղաներ կային հավաքված, ասացին, որ կրակոցները ներքեւի կողմից են եղել՝ Երեւանից դեպի Գառնի եկեղ ճանապարհին: Արագությամբ շարժվեցի այդ ուղղությամբ, հասա գազալցակայան, որտեղ կանգնած էր տղայիս մեքենան, նկատեցի, որ տղայիս մեքենան ավտոմատով խփված է»,-պատմել է գյուղապետը:
Ոստիկանները պարզել են, որ հիշյալ օրը վիճաբանություն է տեղի ունեցել Վարդանյանի որդու՝ Մարզպետ Վարդանյանի, նրա երկու ազգականների եւ Ռուբեն Հակոբյանի միջեւ: Վիճաբանությունը վերածվել է ծեծկռտուքի, որի ընթացքում Ռուբեն Հակոբյանն ինքնաձիգով կրակահերթ է արձակել։ Վնասվել են գյուղապետի որդու ավտոմեքենան, գազալցակայանի սպասասրահի եւ օժանդակ շինության ապակիները: Վիճաբանությանը մասնակցել է նաեւ Գառնի գյուղի բնակիչ Արա Հայրապետյանը:
Ռուբեն Հակոբյանի եւ Արա Հայրապետյանի նկատմամաբ հունիսի 15-ից հետախուզում էր հայտարարվել: Ոստիկանությանը հաջողվել էր դեպքից օրեր անց հայտնաբերել Արա Հայրապետյանին: Իսկ Ռուբեն Հակոբյանը նոյեմբերի 18-ի լույս 19-ի գիշերը հայտնաբերվել է Երեւանի Սարյան փողոցում եւ վերոնշյալ հանցանքը կատարելու կասկածանքով բերման է ենթարկվել: Արա Հայրապետյանը եւ Ռուբեն Հակոբյանը կալանավորված են: Նրանց մեղադրանք է առաջադրվել Քրեական օրենսգրքի 258-րդ հոդվածի 4-րդ մասի եւ 235-րդ հոդվածի 1-ին մասի հատկանիշներով: Քննությունը շարունակվում է:
Նշենք, որ դեպքի առնչությամբ առերեսում է եղել համայնքի ղեկավար Աշոտ Վարդանյանի եւ «Գառնիի Սուրիկի լավաշ» արտադրական ձեռնարկության ղեկավար Անդրանիկ Հակոբյանի որդիների միջեւ:
Ավելի վաղ հայտնել էինք, որ 2015թ. հուլիսի 9-ին Գառնիի գյուղապետ Աշոտ Վարդանյանը ոստիկանություն հաղորդում է ներկայացրել այն մասին, որ իրենց գյուղում հնչել են կրակոցներ, ինչի հետեւանքով վնասվել է որդու ավտոմեքենան: