«Իսլամական պետություն» ահաբեկչական խմբավորումը նոր տեսանյութ է հրապարակել անգլերենով, որում Մեծ Բրիտանիային սպառնում է այն բանի համար, որ վերջինս «սատանայական կոալիցիայի» մաս է կազմում, փոխանցում է Gazeta-ն՝ վկայակոչելով Mirror-ը: Տեսանյութի 4 րոպեների ընթացքում ցուցադրվում են 60 երկրների դրոշները, որոնք պայքարում են ԻՊ-ի դեմ: Տեսաուղերձի նպատակը կոալիցիայի անդամ երկրներին ահաբեկելն է:
«Իրանի, Թուրքիայի եւ Ռուսաստանի մասնակցությամբ այդ սատանայական կոալիցիան պայքարի մեջ է մտել: Ձեզ են միանալու անհավատներ, որոնք պայքարելու են ճշմարտության դեմ: Որքան շատ լինեք, այնքան ուժեղ կլինի մեր հավատը: Մենք հաշվում ենք ձեր դրոշները: Մեր մարգարեն ասել է, որ երբ դրանց թիվը հասնի 80-ի, կբռնկվի պատերազմի կրակը, եւ դուք կայրվեք մահվան բլուրների վրա»,- ասված է տեսաուղերձում:
Այդ դրոշների թվում են այն երկրների դրոշները, որոնք ներգրավված չեն ԻՊ-ի դեմ պայքարի մեջ՝ Ֆինլանդիան, Շվեդիան, Ճապոնիան, Ուկրաինան, Մեքսիկան:
Տեսանյութում նաեւ առանձին հատված կա՝ ուղղված Ամերիկային՝ կոչ անելով խոստովանել, որ Իրաքի եւ Աֆղանստանի պատերազմները թուլացրել են բանակը:
«Ամերիկա՛, դու պնդում ես, թե պատմության մեջ լավագույն բանակն ունես: Դու կարող ես բազմաթիվ զորք եւ զենք ունենալ, սակայն քո զինվորներին չի բավականացնում կամքն ու վճռականությունը: Աֆղանստանում եւ Իրաքում նրանց ստացած վերքերը դեռ չեն լավացել»,- ասված է ուղերձի մեջ:
Հաղորդվում է, որ նմանատիպ ուղերձներ հրապաակվել են ռուսերեն, թուրքերեն եւ ֆրանսերեն:
