Eagles Of Death Metal խումբը Vice պարբերականին առաջին հարցազրույցն է տվել Փարիզի ահաբեկչություններից հետո:
Նոյեմբերի 13-ի ահաբեկչական գործողություններից մեկը տեղի էր ունեցել «Բատակլան» թատրոնում` այս խմբի համերգի ընթացքում, գրոհի հետեւանքով 89 մարդ էր զոհվել, այդ թվում նաեւ` Eagles Of Death Metal-ի իրացման հարցերով մենեջեր Նիկ Ալեքսանդրը: Ահաբեկչական գործողությունների հետեւանքով ընդհանուր առմամբ 129 մարդ է զոհվել:
«Հանդիսատեսը մեր գրիմանոցում էր թաքնվում, եւ մարդասպանները ներխուժեցին այնտեղ», — վերհիշում է խմբի առաջատար Ջեսի Հյուզը: «Նրանք սպանեցին բոլորին, բացի այն տղայից, որը թաքնվել էր իմ կաշվե բաճկոնի տակ: Մարդիկ մեռած էին ձեւանում` այնքան վախեցած էին: Այնքան մարդ զոհվեց հիմնականում նրա համար, որ չէր ուզում լքել ընկերներին, մարդիկ իրենց մարմնով պաշտպանում էին իրար», — ասել է նա, գրում է Gazeta-ն:
Հյուզը հույս է հայտնել, որ Eagles of Death Metal-ը առաջին խումբը կլինի, որը հանդես կգա «Բատակլանում», երբ թատրոնը նորից բացեն: «Ես շատ եմ ուզում վերադառնալ Փարիզ: Մեր ընկերները եկել էին ռոքնռոլ լսելու ու մահացան, իսկ ես ուզում եմ վերադառնալ ու ապրել», — ասել է երաժիշտը:
Համահիմնադիր Ջոշ Հոմմը հաստատել է, որ խումբը կշարունակի եվրոպական շրջագայությունը, որը հետաձգվել էր ահաբեկչական գործողությունների պատճառով: Այժմ Հոմմն իր բարեգործական Sweet Stuff Foundation հիմնադրամի միջոցով նվիրատվություններ է հավաքում փարիզյան գրոհների զոհերի օգտին:
