Արմավիրի մարզի Հայկաշեն համայնքով անցնող խմելու ջրի խողովակատարի մի հատվածը արդեն երկու շաբաթ է՝ ինչ վնասվել է, եւ ջուրն անխնա հոսում է դեպի շրջակա մշակովի հողատարածքները: Ջուրն այդ ընթացքում այնքան է հոսել, որ, կուտակվելով խողովակատարին հարակից գյուղացիների կողմից մշակվող առվույտի (յոնջա) արտերում, առաջացրել է ճահճացում: NEWS.am-ի թղթակիցը եղել է դեպքի վայրում եւ արձանագրել տեղի ունեցածը:
Թե ինչն է եղել խողովակի վթարի առաջացման պատճառը, դեռեւս հայտնի չէ, սակայն հնարավոր պատճառ կարող է լինել խողովակատարի այդ հատվածում կատարվող աշխատանքները: Նշենք, որ այդ աշխատանքներն իրականացվում են «Խաչատուր Բիտենց գրուպ» ընկերության կողմից: «Խաչատուր Բիտենց գրուպ»-ը իրականացնում է խողովակատարի փականների փոխման եւ վերանորոգման աշխատանքներ եւ այդ նպատակով համապատասխան տեխնիկա է կիրառում: Ըստ նախագծի՝ կան ջրահանգույցներ, որոնք ընկերությունը էքսկավատորով քանդում եւ վերացնում է:
Ընկերության տնօրեն Աշոտ Խաչատրյանը չբացառեց, որ վթարը կարող էր առաջանալ իրենց կողմից իրականացվող աշխատանքների հետեւանքով: Նա նաեւ նշեց, որ վթարի մասին տեղյակ են պահել «Հայջրմուղ» ընկերությանը: Ընկերության աշխատակիցները կանխարգելիչ միջոցառումներ են իրականացրել, սակայն ջրի հոսքը չի դադարում: Համայնքի բնակիչների խոսքով՝ Հայկաշենի գյուղապետը դեպքի մասին տեղյակ է պահել Արմավիրի մարզպետին, ով իր հերթին դիմել է համապատասխան մարմիններին՝ վթարի հետեւանքները վերացնելու ակնկալիքով: Գյուղացիները հույս ունեն, որ տարածքային կառավարման նախարարությունը միջոցներ կձեռնարկի՝ իրենց հասցված վնասը փոխհատուցելու ուղղությամբ:
«Հայջրմուղից» խոստացել են եկող երկուշաբթի օրվանից սկսել վթարի հետեւանքները վերացնելու աշխատանքները: Նրանք նշել են, որ եթե այս պահին համապատասխան փակեն ջրի ակունքը, ապա Երեւանի կեսից ավելին մի քանի օրով կջրազրկվի: «Միթե ավելի նպատակահարմար չէ թեկուզ երկու օրով տեղի ունենա ջրազրկում, քան թանկարժեք հեղուկն անխնա հոսի»,-նկատեց վրդովված հայկաշենցիներից մեկը:
Հ.Գ. Հարկ է նշել, որ ջրատարի վթարը վնաս է պատճառել ոչ միայն համայնքի գյուղացիների արտերին, այլ նաեւ հարակից անմշակ հողատարածքներին: Դրանց տերերը, NEWS.am-ի տեղեկություններով, նշված հողատարածքներում մտադիր են ձկնաբուծարաններ կառուցել: Նրանք մտավախություն ունեն, որ ջրի ահռելի քանակով լցված հողը առաջիկայում հնարավոր չի լինի մշակել՝ հետագայում համապատասխան ավազաններ կառուցելու համար:
Լուսանկարը եւ տեսանյութը՝ Գագիկ Շամշյանի
