«Անելիք բանկի» իրավաբան 32-ամյա Հովհաննես Աթայանի սպանության մեղադրանքով կալանավորված 54-ամյա Մկրտիչ Պողոսյանի մասին NEWS.am-ին ուշագրավ մանրամասներ են հայտնի դարձել։ Պարզվում է՝ Պողոսյանը նախկինում դատապարտված է եղել։ 1991 թվականին նա 2,5 տարի ազատազրկվել է մի մարդու մահվան համար, ով աշխատել է իր հացի արտադրամասում։

Մկրտիչ Պողոսյանը հացի արտադրամաս է ունեցել, որտեղ բռնկված հրդեհի հետեւանքով աշխատակիցը մահացել է։ Պողոսյանը ազատազրկվել է այն պատճառով, որ արտադրամասում չի պահպանել հակահրդեհային կանոնները։

Ձեռնարկատիրական գործունեությունը անհաջողության է մատնվել նաեւ հյուրանոցային բիզնեսում։ Նա Երեւանում հյուրանոց է ունեցել, սակայն ֆինանսական խնդիրների պատճառով այն կորցրել է։ Կորցրել է նաեւ իր տունը եւ ողջ ունեցվածքը։ Ըստ որոշ տեղեկությունների՝ նա իր գործարքները կատարել է «Անելիք բանկի» միջոցով եւ հերթական խնդիրների պատճառով էլ դիմել է նման քայլի։ Սակայն սպանության պատճառները դեռ պարզվում են, պաշտոնապես որեւէ բան հայտնի չէ։

Ավելի վաղ NEWS.am-ը հայտնել էր, որ Երեւանի Վարդանանց փողոցում նոյեմբերի 24-ին, ժամը 20:30-ի սահմաններում, կրակոցներ են հնչել, ինչի հետեւանքով տեղում մահացել է «Անելիք բանկի» իրավաբան Հովհաննես Աթանյանը:

Նշենք, որ փաստի առթիվ հարուցվել է քրեական գործ Քրեական օրենսգրքի 104-րդ հոդվածի 1-ին մասով (Սպանություն՝ ապօրինաբար մեկ ուրիշին դիտավորությամբ կյանքից զրկել։ Պատժվում է ազատազրկմամբ՝ վեցից տասներկու տարի ժամկետով)։

Մկրտիչ Պողոսյանը նոյեմբերի 25-ին հայտնաբերվել է, իսկ նոյեմբերի 26-ին կալանավորվել է։