Իգարկա օդանավակայանի թռիչքուղուց օդ բարձրանալուց մի քանի րոպե հետո կործանված, «Տուրուխան ավիա» ընկերությանը պատկանող «Մի-8» ուղղաթիռի անձնակազմը ամենափորձառուներից մեկն էր ավիաընկերությունում: Նախնական տեղեկություններով, թռիչքը սպասարկել է երկու օդաչուից եւ մեկ բորտմեխանիկից կազմված անձնակազմը, որոնք բոլորն էլ մահացել են:
Ուղղաթիռի հրամանատարը 54-ամյա Ալեքսանդր Մոնախովն է, որն իր կյանքում թռել էր ընդհանուր առմամբ, 9019 ժամ եւ ոչ մի պատահար նրա հետ տեղի չէր ունեցել:
Երկրորդ օդաչուն 53-ամյա Լեւոն Թանանյանն է, որը նույնպես մեծ փորձ ուներ (9383 ժամ թռիչք), հաղորդում է Lifenews-ը:
Ուղղաթիռի անձնակազմի 3-րդ անդամը 54-ամյա բորտմեխանիկ Ռադիկ Վալեեւն է, որն իր ակտիվում ունեցել է 8315 ժամվա թռիչք:
Հիշեցնենք, որ ուղղաթիռը կործանվել է ՌԴ Կրասնոյարսկի երկրամասի Տուրուխանի շրջանում:
Նշենք, որ Ռուսաստանում հայաստանի դեսպանատնից NEWS.am-ին հայտնեցին, որ այս պահին ճշտում են զոհերի թվում ՀՀ քաղաքացիների եւ հայերի առկայությունը:
