«Նոր Հայաստան» հանրային փրկության ճակատի «Ընդդիմության միասնական շտաբի» ղեկավար Ժիրայր Սեֆիլյանի կինը հարձակման է ենթարկվել: Այս մասին հաղորդագրություն է տարածել շտաբը:
Հաղորդագրությունում ասվում է, որ նոյեմբերի 26-ին՝ ժամը 16:30-ի սահմանում, երբ Նանոր Բարսեղյանը դուրս է եկել Ամիրյան փողոցի վրա գտնվող «Բիբլոս» բանկի մասնաճյուղի շենքից, հարձակվել են նրա վրա, քաշքշել և, հափշտակելով պայուսակը, որտեղ եղել են փաստաթղթեր և անձնական իրեր եւ գումար, փախուստի դիմել:
Ըստ հաղորդագրության՝ բացի այդ, նոյեմբերի 23-ի երեկոյան Նանոր Բարսեղյանը, մոտենալով «Մարիոթ Հայաստան» հյուրանոցի մոտ կայանած իր ավտոմեքենային, տեսել է, որ անվադողից ամբողջ օդը բաց են թողել: Նոյեմբերի 25-ի երեկոյան իր ավտոմեքենայով տուն գնացող Նանոր Բասեղյանին հետապնդել են ՎԱԶ 2121 (Նիվա) մակնիշի 20 ou 700 պետհամարանիշի մուգ ապակիներով ավտոմեքենայով: Հետապնդման ընթացքում մի քանի անգամ ավտոմեքենայով փակել են նրա ճանապարհը՝ փորձելով ստեղծել ավտոմեքենաների բախման և ֆիզիկական բռնության հավանականության տպավորություն: