Բեմադրության անհրաժեշտություն չկար։ Այսօր՝ նոյեմբերի 26-ին, ՀՀԿ ԳՄ նիստից հետո լրագրողների հետ հանդիպմանը նման կարծիք հայտնեց ԱԺ փոխնախագահ Հերմինե Նաղդալյանը` արձագանքելով սոցցանցերում եւ մամուլում շրջանառվող կարծիքին, թե ՀՀ ԱԱԾ-ի կողմից նոյեմբերի 25-ին ենթադրյալ հանցախմբի վնասազերծումը բեմադրված է եղել։
«Բեմադրության անհրաժեշտություն չկար: Ըստ իս՝ մեր պատկան կառույցները որակյալ աշխատանք են կատարել, սա մեկ-երկու օրվա աշխատանք չի եղել, այլ խորքային աշխատանք է կատարվել: Շատ կարեւոր է, որ մեր պատկան կառույցները կարողացան առանց բացասական հետեւանքների այս աշխատանքը կատարել»,- ասաց Հերմինե Նաղդալյանը՝ նշելով, որ պետք է գոհունակություն հայտնել ԱԱԾ-ին եւ ոստիկանությանը՝ նման աշխատանք կատարելու համար:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով։
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: