Երեւանի «Շենգավիթ» բժշկական կենտրոնը պարզաբանում է հրապարակել նոյեմբերի 19-ին երեկոյան 25-ամյա ծննդկանի արգանդում մահացած 36 շաբաթական պտուղի դեպքի վերաբերյալ:

Պարզաբանումն ամբողջությամբ ներկայացնում ենք ստորեւ. ««Շենգավիթ» ԲԿ ադմինիստրացիան մինչ օրս որեւէ պաշտոնական հայտարարություն չի արել` հիմնվելով «Բնակչության բժշկական օգնության եւ սպասարկման մասին» ՀՀ օրենքի 7-րդ հոդվածի /Առողջական վիճակի մասին տեղեկություն ստանալու մարդու իրավունքը/ պահանջի վրա: Այժմ հրապարակում ենք ստորեւ ներկայացված տեղեկատվությունը, քանի որ ստացել ենք իր ծննդաբերության մասին տեղեկությունները լրատվամիջոցներին տրամադրելու վերաբերյալ քաղ. Լարիսա Անդրանիկի Շախպազյանի գրավոր համաձայնությունը:

Արմավիրի մարզի Լեռնագոգ գյուղի բնակիչ, հղի, 27.06.1990թ. ծնված Լարիսա Անդրանիկի Շախպազյանը «Շենգավիթ» ԲԿ նոյեմբերի 09-ի վաղ առավոտյան 02:00-ին բերվել է առանց ուղեգրի, ամուսնու մոր կողմից: Կինը ս. թ. 02.11-05.11-ին հոսպիտալացված է եղել «Արմավիր» ԲԿ-ում «Հղիություն 33 - 34 շաբաթ: Սպառնացող վաղաժամ ծննդ.» ախտորոշումով, որտեղ ստացել է կոսերվատիվ բուժում, իսկ դուրսգրման քաղվածքում նշանակվել է հակաանեմիկ բուժում «Սորբիֆեր»-ով: Մինչ «Շենգավիթ» ԲԿ դիմելը գտնվել է տանը:

Դիմելիս հղին գանգատվել է որովայնի ստորին հատվածներում կծկանքանման ցավերից ու, ըստ կնոջ խոսքերի, պտղաջրերի արտահոսքից:

Կինը ավագ հերթապահ բժշկի կողմից հոսպիտալացվել է հղիների ախտաբանության բաժանմունք, ուր իրականացվել են պահանջվող բոլոր հետազոտությունները, ընդ որում, իրականացվել է պտղաջրերի առկայության թեստ: Պտղաջրեր այդ պահին չեն հայտնաբերվել: Ախտորոշվել է «Հղիություն 33 – 34 շաբաթ, սպառնացող վաղաժամ ծննդաբերություն, բարդացած սոմատիկ անամնեզ, վահանաձեւ գեղձի դիֆֆուզ խպիպ»: Հղիության ողջ ընթացքում ստացել է «Էութիրոքս» 25 մգ դեղաչափով: Բաժանմունքում անմիջապես սկսվել է հղիության պահպանման եւ պտղի շնչական դիսթրես համախտանիշի կանխարգելիչ թերապիա:

Առավոտյան կինը զննվել է նաեւ մանկաբարձական բաժանմունքի պատասխանատուի կողմից: Նոյեմբերի 10-ի առավոտյան նշվել է պտղաջրերի արտահոսք, ախտորոշվել է «պտղապարկի բարձր կողմնային պատռում, չափավոր սակավաջրություն» ինչի կապակցությամբ սկսվել է նաեւ հակաբակտերիալ բուժում: Ընթացքում իրականացվել է էնդոկրինոլոգի խորհրդատվություն, հաստատվել է էութիրեոզ վիճակը, լրացուցիչ դեղորայք չի նշանակվել: Բուժման ամբողջ ընթացքում հղին գտնվել է բաժանմունքի անձնակազմի հսկողության տակ:

Ս. թ. նոյեմբերի 19 - ի առավոտյան ժամը 10-ից, հաշվի առնելով մանկաբարձական իրավիճակը (թոքերի հասունությունը, պտղապարկի բարձր կողմնային պատռումը հասուն պտղի պարագայում, պտղաջրերի շարունակական արտահոսքը), որոշվել է խթանել ծննդաբերությունը եւ կեսարյան հատման ցուցումների բացակայության պարագայում ծննդալուծել կնոջը բնական ճանապարհով: Ինդուկցիայի առաջին փուլի ավարտից հետո կինը ծննդաբերության մեջ չի մտել, որի պատճառով տրամադրվել է հանգիստ: Ընթացքում պտղի սրտի բաբախը վերահսկվել եւ գրանցվել է սարքերի միջոցով ժամը 17:00 եւ 20:00: Հերթապահ բժիշկը համայցի ժամանակ արթնացրել է քնած կնոջը, զննել նրան եւ ժամը 21:10 գրանցել է պտղի սրտի զարկի բացակայություն, արձանագրել է պտղի անտենատալ մահ, որը եւ հաստատվել է ՈՒՁ հետազոտությամբ:

Կինը ծննդալուծվել է ցավազրկման ներքո, բնական ճանապարհով` մահացած պտղով 20.11.2015 առավոտյան ժամը 07:30: Պտուղը ծնվել է պարանոցին եւ ստորին վերջույթներին պորտալարի ամուր փաթաթումով, պորտալարի երկարությունը կազմել է 47 սմ (կարճ պորտալար):

Ծննդաբերության ընկերքային շրջանը բարդացել է արգանդի պատին ընկերքի մասնակի ամուր կպումով եւ արյունահոսությամբ: Իրականացվել է ընկերքի ձեռքային անջատում եւ արգանդի բռունցքի վրա մերսում: Արյունահոսությունը արագ դադարեցվել է: Հաշվի առնելով ծննդաբերության ու ընկերքի ձեռքային անջատման ժամանակ արյան կորուստը, հետծննաբերական շրջանում ծննդկանին նաեւ էրիթրոցիտար զանգված է ներարկվել: Սույն թվականի նոյեմբերի 23-ին ժամը 19 – ին, կինը հարազատների ուղեկցությամբ ինքնակամ լքել է բաժանմունքը, չնայած այն բանին, որ վարող բժշկի ու ծառայության ղեկավարի կողմից մանրամասնորեն տեղեկացվել են հնարավոր բարդությունների մասին եւ նրանց հորդորել են մնալ կլինիկայում նշանակումները շարունակաբար ստանալու նպատակով:

Պտղի մահվան պատճառը եղել է կարճ պորտալարի պարագայում (47 սմ) պորտալարի ամուր փաթաթումը: Առավել ստույգ տվյալներ կտրամադրենք պաթոհիստոլոգիական հետազոտության արդյունքներից հետո»:

Հիշեցնենք, որ ծննդկանի հարազատները բժիշկներին են մեղադրում կատարվածի մեջ: