Բաթումում օրերս կայացել է Բաթումի ֆուտզալի հայկական «Աղբյուր» թիմի, վերջինիս դրոշի, զինանշանի ինչպես նաեւ օրհներգի համատեղ շնորհանդեսը, որը կազմակերպվել էր Բաթումում ՀՀ գլխավոր հյուպատոսության եւ «Աջարիայի հայերի միություն» կազմակերպության համատեղ նախաձեռնությամբ ու ջանքերով:
Շնորհանդեսի սկզբում, տղամարդկանց «Բաթում» երգչախումբը կատարել է թիմի՝ «Զարթիր լաո» հանրահայտ հայրենասիրական երգի հիման վրա կազմված օրհներգը, որը մեծ ջերմությամբ է ընդունվել ներկաների կողմից:
Իր ելույթում, Բաթումում ՀՀ գլխավոր հյուպատոս Արամ Գրիգորյանը, շնորհավորելով ներկաներին ու թիմին, խոսել է այն մասին, որ ազգային փոքրամասնության ներկայացուցիչներից /դիցուք՝ աջարահայերից/ կազմված թիմի մասնակցությունը հյուրընկալող երկրի ազգային առաջնությանը, ինչը հնարավոր եղավ իրագործել այս տարի՝ մեծ իրադարձություն է ոչ միայն բաթումահայ համայնքի, այլեւ ողջ Վրաստանի համար՝ մասնավորապես սեփական ժողովրդավարական, տոլերանտ կեցվածքը մեկ անգամ եւս հաստատելու առումով: Դիվանագետը նշել է, որ աշխարհում հաշված երկրներ կան, որոնց ազգային առաջնություններին մասնակցել են հայերից կազմված թիմեր:
Ելույթ ունեցողները՝ բաթումահայ համայնքի հայկական կազմակերպություննների ղեկավարներն ու աջարահայության հոգեւոր հովիվ Արարատ քահանա Գումբալյանը, ինչպես նաեւ Աջարիայի կառավարության ու Բաթումի քաղաքապետարանի ներկայացուցիչները, ողջունելով թիմի ստեղծումը, նորանոր հաղթանակներ են մաղթել նրան:
Նշենք նաեւ, որ «Աղբյուր» թիմը, բացի Գլխավոր հյուպատոսությունից ու աջարահայ համայնքից, հովանավորվում է նաեւ Աջարիայի կառավարության եւ Բաթումի քաղաքապետարանի կողմից:
