Եվրասիական տնտեսական հանձնաժողովի Կոլեգիայի անդամ, նախարար Ռոբերտ Հարությունյանը «ԵՏՄ շրջանակներում աուդիտորային ծառայությունների միասնական շուկա ստեղծելու հարցերով ռուս-հայկական համագործակցություն» թեմայով կլոր սեղան քննարկման ժամանակ պատմել է ԵՏՄ երկրներում ծառայությունների միասնական շուկա ստեղծելու փուլերի եւ դրա հեռանկարների մասին։
Ինչպես NEWS.am-ը տեղեկանում է ԵՏՀ մամուլի ծառայությունից, կլոր սեղան քննարկման ժամանակ Ռոբերտ Հարությունյանն առանձնացրել է ԵՏՄ երկրների տնտեսությունների զարգացման համար ծառայությունների ոլորտի կարեւորությունը։ «Ծառայությունների ոլորտը որոշ երկրներում կազմում է ՀՆԱ մինչեւ 70 տոկոսը։ ԵՏՄ-ում դա 50 տոկոսն է, ինչը խոսում է ավելացված արժեքի ստեղծման մեջ այդ ծառայությունների էական դերի մասին»,- նշել է նախարարը։
Ինչպես հավելել է Ռոբերտ Հարությունյանը, ԵՏՄ շրջանակներում մշակվել է աուդիտորային ծառայությունների միասնական շուկայի ստեղծման ճանապարհային քարտեզ։ Մասնավորապես սահմանվել են աուդիտորային ծառայությունների մասին պայմանագրերի նախապատրաստման եւ համաձայնեցման ժամկետները, որոնցում նշված են լինելու աուդիտի միջազգային չափանիշներին անցնելու երկրների պարտականությունները։ Դա հատկապես կարեւոր է, քանի որ շուկայի զարգացման հետ միաժամանակ պետք է զարգանա նաեւ երրորդ երկրներ արտահանումը։
