Սաուդյան Արաբիայի իշխանությունները ծրագրում են գլխատել ահաբեկչության մեջ կասկածվող ավելի քան 50 մարդու, որոնցից երեքը անչափահաս են, գրում է Gazeta –ն վկայակոչելով The Independent-ը:
Այս տարի երկրում արդեն մոտավորապես 150 մահապատիժ է եղել, բաց սա առաջին դեպքն է, երբ քաղաքացիներին մահվան են դատապարտել ահաբեկիչների հետ կապերի համար: Ընդ որում պարբերականը շեշտում է, որ դատապարտվածներից յոթը շիաներ են: Նշում են, որ սաուդյան շիաները վաղուց են բողոքում սուննի կառավարության կողմից խտրականություններից ու դաժան վարվեցողությունից:
Կալանավորված յոթ շիաների մայրերը հավաստիացնում են, որ կալանավայրում իրենց որդիներին կտտանքների են ենթարկել:
Այդուհանդերձ, սաուդյան իշխանությունները անտեսում են նման դժգոհությունները, հայտնում է հոդվածագիրը: Amnesty International իրավապաշտպան կազմակերպության ներկայացուցիչ Սեւակ Քեչիչյանը հայտարարել է, որ տարբեր ապացույցներ կան այն մասին, որ ոստիկանները կտտանքների են ենթարկում քաղաքացիներին ու կոչ է արել կտտանքների մասին մանրակրկիտ ու անկողմնակալ հետաքննություն անցկացնել: Նա նաեւ հավելել է, որ կազմակերպությունը բոլոր դեպքերում դատապարտում է մահապատիժները: