Գերմանիայի Դարմշթադ քաղաքում մուսուլմանական ընտանիքի խստաբարո հայրը սպանել է իր 19-ամյա դստերը նախամուսնական սեքս ունենալու պատճառով։ Այս մասին հայտնում է Focus Online-ը։
52-ամյա պակիստանցի տղամարդը կնոջ հետ միասին դատարանի առջեւ է կանգնել սեփական երեխային սպանելու համար։ Մայրը մեղադրվում է հանցագործությանն ականատես լինելու եւ մարդասպանին հետ չպահելու մեջ։
Դարմշթադի շրջանային դատախազը աղջկա դաժան սպանության համար պահանջում է ծնողներին ցմահ ազատազրկման դատապարտել՝ 15 տարով զրկելով համաներման իրավունքից, քանի որ հայրն ու մայրը սառնասրտորեն պլանավորել են 19-ամյա աղջկա սպանությունն այն պատճառով, որ նա սեռական կապ է ունեցել տղամարդու հետ, որի հետ ամուսնացած չի եղել։
Դատախազի խոսքով՝ ծնողները դատարանում ավելի շատ մտահոգված են իրենց պատվի համար, քան սեփական երեխային սպանելու եւ դրա պատիժը կրելու։ Դատախազի խոսքից պարզ է դառնում, որ հայրն աղջկան սպանել է այս տարվա հունվարին՝ քնած ժամանակ խեղդամահ անելով նրան։ Սպանությունը կատարվել է մոր լուռ համաձայնությամբ։ Դրանից հետո նրանք աղջկա մարմինը դրել են աղբի տոպրակի մեջ եւ դուրս նետել։
Պաշտպանող կողմը պնդում է, որ գործը քննելիս պետք է հաշվի առնել ընտանիքի մուսուլմանական ծագումը։ Պակիստանից ժամանած ընտանիքը խիստ պահպանողական հայացքներ ունի նման հարցերում, քանի որ իսլամը նախամուսնական սեքսը մեծ մեղք է համարում։
Շրջանային դատարանը գործով վճիռ կկայացնի եկող հինգշաբթի։