Ազգային անվտանգության ծառայության կողմից նոյեմբերի 25-ին վնասազերծված, ծանր հանցագործություններ նախապատրաստվելու մեջ կասկածվող 21 անձանցից մեկն ազատամարտիկ, պահեստազորի փոխգնդապետ Խաչիկ Ավետիսյանն է: NEWS.am-ի այս տեղեկությունը հաստատեց նրա մտերիմ ընկեր, ազատամարտիկ Վլադիմիր Առաքելյանը:

«Խաչիկ Ավետիսյանին ձերբակալել են նոյեմբերի 25-ին առավոտյան 06:30-ի սահմաններում: Եկել են, տունը խուզարկել Խաչիկ Ավետիսյանին էլ ձերբակալել են եւ տարել»,- ասաց Վլադիմիր Առաքելյանը՝ նշելով, որ Ավետիսյանին արդեն տրամադրվել է հանրային պաշտպան:

Հիշեցնենք, որ Խաչիկ Ավետիսյանը քաղբանտարկյալների ազատելու պահանջով հացադուլ էր անցկացրել Երեւանի Ազատության հրապարակում եւ Մարդու իրավունքների պաշտպանի գրասենյակի մոտ:

Ավելի վաղ հայտնել էինք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում  հայտնաբերել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ,  փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:

ՀՀ ԱԱԾ քննչական վարչությունում   հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: