Վանաձորում 8-ամյա որդուն մուրացկանության դրդելու մեջ մեղադրվող Տատյանա Պիսարեւայի 3 անչափահաս երեխաների ճակատագիրը որոշելու համար Վանաձորի քաղաքապետարանը որոշել է Պիսարեւային բերման ենթարկել հանձնաժողովի նիստին՝ որոշում կայացնելու համար: Այս մասին NEWS.am-ի թղթակցին հայտնեցին Վանաձորի քաղաքապետարանից:
Երեխաներն այս պահին գտնվում են պետական խնամքի տակ: Վանաձորի քաղաքապետարանն արդեն մի քանի անգամ հանձնաժողովի նիստ է հրավիրել՝ որոշելու համար, թե երեխաներն ում խնամքի տակ պետք է լինեն, սակայն Պիսարեւան հրաժարվում է նիստերին մասնակցել:
Նշենք, որ Տատյանա Պիսարեւան դատարանի կողմից մեղավոր է ճանաչվել եւ դատապարտվել 1 տարվա ազատազրկման, սակայն պատիժը պայմանականորեն չի կիրառվի: Դատարանի որոշումն օրինական ուժի մեջ մտնելուց հետո պարզ կլինի երեխաների հետագա ճակատագիրը:
Հիշեցնենք, որ ըստ մեղադրական եզրակացության՝ Վանաձորի բնակչուհի Տատյանա Պիսարեւան հունիսից օգոստոսն ընկած ժամանակահատվածում պարբերաբար 8-ամյա որդուն ներգրավել է մուրացկանության մեջ: 8-ամյա տղան տարբեր քաղաքացիներից մուրացել եւ նրան է փոխանցել գումար:
Տատյանա Պիսարեւային մեղադրանք է առաջադրվել Քրեական օրենսգրքի 166.1-րդ հոդվածի 2-րդ մասով, եւ նրա նկատմամբ խափանման միջոց է ընտրվել ստորագրություն չհեռանալու մասին:
