Ռուսաստանի արտգործնախարար Սերգեյ Լավրովը վստահություն է հայտնել, որ ամերիկյան կոալիցիան, որը 2014-ից ի վեր պայքարում է «Իսլամական պետություն» (ԻՊ) խմբավորման դեմ, չէր կարող չարձանագրել ԻՊ-ի անօրինական նավթային բիզնեսը, բայց տարուց ավելի է, ինչ դրա դեմ ոչինչ չի ձեռնարկել:
«Երբ մեր ավիացիան նախագահ Ասադի խնդրանքով սկսեց աշխատել սիրիական օդային տարածքում, մենք օդից տեսանք անօրինական նավթային բիզնեսի այդ պատկերը: Նախագահ Պուտինը մի քանի անգամ ասել է այդ մասին, Անթալիայում «Քսանյակի» իր գործընկերներին ցույց է տվել համապատասխան լուսանկարները, որոնք շատ պերճախոս են եւ համոզիչ», — ասել է Լավրովը իր սիրիացի գործընկեր Վալիդ Մուալլեմի հետ բանակցությունների ավարտին տեղի ունեցած մամուլի ասուլիսի ընթացքում, տեղեկացնում է «ՌԻԱ Նովոստին»:
«Իսկ ամերիկյան կոալիցիան սկսել է Իրաքի եւ Սիրիայի օդում թռչել, իմիջիայլոց, առանց սիրիական կառավարության համաձայնության եւ մեր ՌՀՈՒ-ի ինքնաթիռներից ավելի քան մեկ տարի առաջ: Ես վստահ եմ, որ նրանք այդ ամենը տեսել են, բայց չգիտես ինչու, ձեռք չեն տվել դրան: Միայն երբ ռուսական ՌՀՈՒ-ն սկսեց աշխատել այդ շրջանում, սկսեցին հարվածներ հասցնել այդ հանցավոր ինդուստրիայի ուղղությամբ», — հավելել է ՌԴ արտգործնախարարը:
