Բելգիական դատաքննիչը մեղադրանք է առաջադրել Փարիզի ահաբեկչությունների գործով ձերբակալված վեցերորդ կասկածյալին: Այս մասին ասված է դաշնային դատախազության հայտարարության մեջ:
«Երեկ Բրյուսելում եւս մեկ մարդ է ձերբակալվել՝ հարցաքննության նպատակով: Այսօր դատաքննիչը կալանքի տակ է առել նրան: Նա մեղադրվում է ահաբեկչություններին եւ ահաբեկչական խմբերի գործունեությանը մասնակցության մեջ»,- հաղորդել են դատախազությունը:
Ներկայում Փարիզի ահաբեկչությունների գործով մեղադրանք է առաջադրվել Բելգիայի 6 քաղաքացու: Հետաքննության վարկածով, նրանցից երկուսը՝ Մոհամմեդ Ամրին եւ Համզա Ատտուն Փարիզից Բրյուսել են հասցրել ահաբեկչությունների գլխավոր կասկածյալին՝ Ֆրանսիայի եւ Բելգիայի կողմից հետախուզվող Սալահ Աբդեսլամին:
ՌԻԱ Նովոստիի փոխանցմամբ, երրորդ մեղադրյալը Բելգիայում ծնված 39-ամյա մարոկկացի Լազեզ Աբրահիմին է, որին ձերբակալել են Բրյուսելում խուզարկությունների ժամանակ: Գործով չորրորդ մեղադրյալը 31-ամյա ֆրանսիացի Ալի Ուլքադին է, որը բնակվում է Բրյուսելի Մոլենբեկ կոմունայում, իսկ հինգերորդ մեղադրյալի մասին պաշտոնապես ոչինչ չի հաղորդվում:
Հիշեցնենք, որ նոյեմբերի 13-ին Փարիզում տեղի ունեցած ահաբեկչությունների հետեւանքով 130 մարդ է զոհվել, ավելի քան 350 հոգի վիրավորվել է: