Երեւանի 26-ամյա բնակիչ Գարիկ Բաբայանը դատարանի առջեւ է կանգնել զինծառայակցին ծեծի ենթարկելու համար:
Նախկինում չդատված Գարիկ Բաբայանը լինելով ՀՀ ՊՆ զորամասի պայմանագրային զինծառայող, սերժանտ, 2015թ. օգոստոսի 20-ին, վիճաբանել է ՀՀ ՊՆ զորամասի ժամկետային զինծառայող, սերժանտ Խաչատուր Սարգսյանի հետ եւ ծեծի ենթարկել նրան: Գարիկ Բաբայանը ձեռքով հարվածել է Խաչատուրի աջ աչքին` նրան պատճառել մարմնական վնասվածքներ:
Գարիկ Բաբայանին մեղադրանք է առաջադրվել ՔՕ 359-րդ հոդվածի 1-ին մասով` Զինծառայողների փոխհարաբերությունների կանոնագրքային կանոնները խախտելը նրանց միջեւ ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով՝ պատժվում է կալանքով՝ առավելագույնը երեք ամիս ժամկետով, կամ կարգապահական գումարտակում պահելով՝ առավելագույնը երկու տարի ժամկետով, կամ ազատազրկմամբ՝ առավելագույնը երկու տարի ժամկետով:
Գարիկ Բաբայանի նկատմամաբ որպես խափանման միջոց ընտրվել է ստորագրություն չհեռանալու մասին: