ԱՄՆ պետքարտուղարությունն անհանգստություն է հայտնել թուրքական լրատվամիջոցների շուրջ ստեղված իրավիճակով, որոնք ճնշման են ենթարկվում կառավարության գործողությունները քննադատելու համար:
«Մենք կոչ ենք անում Թուրքիայի իշխանություններին ապահովել իրավիճակ, որտեղ բոլոր անձինք ու կազմակերպությունները, այդ թվում լրատվամիջոցները, կարող են ազատորեն ներկայացնել իրենց կարծիքների ու քննադատությունների ողջ սպեկտրը՝ լրատվամիջոցների ազատության եւ կարծիքի ազատ արտահայտման մասին Թուրքիայի սահմանադրության երաշխիքների համաձայն»,-ասված է հաղորդագրությունում, որը ստորագրել է Պետքարտուղարության ներկայացուցիչ Մարկ Թոները, հաղորդում է Gazeta-ն:
Ավելի վաղ նշվել էր, որ Թուրքիայում լրագրողներ են ձերբակալվել՝ Անկարայի կողմից Սիրիայի գրոհայիններին զենք մատակարարելու մասին հոդվածի համար:
ԱՄՆ պետքարտուղարությունը հստակեցնում է, որ սա առաջին դեպքը չէ, որ կառավարությանը քննադատող լրագրողները բախվում են ճնշումների՝ երկրի իշխանությունների կողմից:
