Երեւանի «Շենգավիթ» բժշկական կենտրոնում նոյեմբերի 19-ին երեկոյան 25-ամյա ծննդկանի արգանդում մահացած 36 շաբաթական պտուղի դեպքի վերաբերյալ նյութերը ոստիկանությունն արդեն ուղարկել է Քննչական կոմիտե:
Քննչական կոմիտեից NEWS.am-ին հայտնեցին, որ դեպքի առթիվ հարուցվել է քրեական գործ Քրեական օրենսգրքի 130-րդ հոդվածի հատկանիշներով, այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը:
Նշենք, որ ծննդկանի հարազատները «Շենգավիթ» ԲԿ-ի բժիշկներին են մեղադրում: http://news.am/arm/news/297529.html Ծննդկանի տագրը՝ Արթուր Քոչարյանը, պատմել էր, որ եթե Լարիսային հետազոտեին, պետք է անմիջապես կեսարյան հատում կատարեին, բայց հերթապահ բժիշկը միայն արհեստական ցավեր է տվել
«Սա հիվանդանոց չէ, չգիտեմ էլ՝ ինչի է... հարսիս գոնե ծնարան տանեին, իմանային՝ ինչ է կատարվում: Միայն ցավեր են տվել, հետո էլ հարսս զգացել է, որ երեխան այլեւս չի շարժվում: Երբ բժիշկները տարել են հետազոտման, հայտարարել են, թե սրտի կանգ է գրանցվել, իսկ Անի Սեյրանովնան չգիտենք ինչով էր զբաղված այդ պահին»,- ասել էր ծննդկանի տագրը:
«Շենգավիթ» ԲԿ-ն նոյեմբերի 27-ին պարզաբանում է հրապարակել՝ նշելով, որ պտուղը ծնվել է պարանոցին եւ ստորին վերջույթներին պորտալարի ամուր փաթաթումով, պորտալարի երկարությունը կազմել է 47 սմ (կարճ պորտալար):
