Հայաստանի նախագահ Սերժ Սարգսյանն այցելել է Ադրբեջանին սահմանակից Ճամբարակ քաղաքի Ֆերմերների աջակցության կենտրոն: Պետության ղեկավարն աչքի է անցկացրել տնային ֆերմերային արտադրանքի` կաթի, պանրի, մեղրի արտադրության նոր տեխնոլոգիաները:
Կենտրոնում ֆերմերները կարող են գյուղատնտեսական տեխնիկա ձեռք բերել` ինչպես տրակտորներ, այնպես էլ ավելի թեթեւ մեքենաներ (ձեռքի հնձիչներ, կթելու ագրեգատներ եւ այլն): Ինչպես NEWS.am-ի թղթակցին ասել է կենտրոնի տնօրեն Հայկազ Խաչատրյանը, տեխնիկան լիզինգային հիմունքներով տրամադրվում է Ագրոբիզնեսի եւ գյուղի զարգացման կենտրոնի (CARD) կողմից, որը գործում է ԱՄՆ-ի գյուղատնտեսության նախարարության (USDA) աջակցությամբ:
«Ֆերմերների համար պայմանները մատչելի են. 30 տոկոս կանխավճար եւ մարման համար 2 տարի: Համեմատաբար փոքր ագրեգատներ կան, մոտ` 1 – 1,5 մլն դոլար արժեցող, բայց որոնք շատ կարեւոր են ֆերմերի համար, ինչպես օրինակ հնձի կամ կթի սարքերը: Շատ շահավետ է այսպես ձեռք բերել դրանք», - հավելել է նա:
Բացի այդ, կենտրոնը նախատեսել է պանրի ֆերմենտացիայի համար ժամանակակից պեպսիններ տրամադրել:
«Խորհրդային Միությունում շատ քիչ շրջաններն իրավունք ունեին պինդ, այսինքն` շվեյցարական պանիր արտադրելու: Մի քանի նման գյուղ մեզ մոտ էլ կար` այն ժամանակվա Կրասնոսելսկի շրջանում: Այսինքն անասնապահությունը մեզ մոտ միշտ շատ զարգացած է եղել: Հնարավորություններ կան վերածնելու եւ բազմապատկելու այն, ինչ կար», - հավելել է Խաչատրյանը:
Կենտրոնը բացվել է Համաշխարհային բանկի` «Գյուղատնտեսական ռեսուրսների կառավարում եւ մրցունակություն» ծրագրի շրջանակում, որը սկսվել է 2011-ին եւ ավարտվել` 2016-ին: Երկու նման կենտրոն արդեն բացվել է Հայաստանի այլ շրջաններում Արագածոտնի շրջանի Արտաշավան գյուղում եւ Սյունիքի շրջանի Խնձորեսկում: