Երեւանի բնակիչ, 75-ամյա Կարապետ Ոսկանյանը 2015թ. հունվարի 25-ին 47-ամյա որդուն կացնով սպանել, այնուհետեւ նրա մարմինն ավտոտնակում թաղել է կնոջ իմացությամբ: NEWS.am-ի հետ զրույց նման պնդում արեցին սպանված Գերման Ոսկանյանի հարազատները:
«Կինն իմացել է, մի քանի շիշ էլ ջուր է լցրել դրել, որ ամուսինը գա, տանի, ավտոտնակը լվա: Ոստիկանությունում էլ ասել է՝ լավ ենք արել, սպանել ենք, հասցրել ա, սպանել ենք: Սպանել են, հետո էլ գնացել, նստել հաց էին ուտում»,- NEWS.am-ին ասաց սպանված Գերման Ոսկանյանի կինը՝ Գոհար Պապոյանը:
Նա պատմեց, որ ամուսնու անհետացման օրը սկեսրայրը տարօրինակ պահվածք է ցույց տվել, երբ հարսը տուն է եկել, նրան ասել է, թե տեսել է՝ ինչպես է Գերմանը նստում ազգությամբ ռուս տղամարդկանց ավտոմեքենան ու գնում: Տիկին Գոհարի պատմելով՝ երբ ինքը որոշել է ոստիկանությունում հաղորդում տալ ամուսնու անհետացման մասին, սկեսրայրը փորձել է թույլ չտալ:
«Այդ օրը մինչեւ ուշ գիշեր զանգահարում էի, չէր պատասխանում Գերմանը: Բայց նախքան տուն գալը խոսել էի հետը, ասում էր՝ տուն է հասնում: Հետո հաջորդ ամբողջ օրը փնտրում էինք, մեր բարեկամները գիտեին, որ Գերմանն անհետացել է: Հաջորդ օրը Գերմանի հայրը ավտոտնակ էր իջել, ինչ-որ բաներ էր արել: Դրանից հետո մտանք ավտոտնակ, ոչինչ չգտանք»,- պատմեց սպանվածի կինը:
Սպանությանից երկու օր անց ոստիկանությունը գտել է Գերման Ոսկանյանի մարմինը ավտոտնակում՝ գլխի բազմաթիվ վնասվածքներով:
Կարապետ Ոսկանյանը, որը ոստիկանությունում ինքնախոստովանական ցուցմունք է տվել, դատաքննության փուլում մի քանի անգամ փոխել է ցուցմունքը՝ հակասելով ինքն իրեն: Նա այժմ պնդում է, որ անմեղ է, որդուն չի սպանել: Ըստ դատաբժշկական փորձաքննության եզրակացության՝ Կարապետ Ոսկանյանը աֆեկտի վիճակում չի եղել որդուն սպանելիս:
Հարազատների համար մինչեւ հիմա անհասկանալի է՝ ինչու է Կարապետ Ոսկանյանը նման բան արել:
Կարապետ Ոսկանյանին մեղադրանք է առաջադրվել ՔՕ-ի 104 հոդվածի 1 մասով` սպանությունը՝ ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ վեցից տասներկու տարի ժամկետով: