Արգենտինայի Ռիո Նեգրո նահանգում տեղակայված խաղաղ ուրանի հարստացման գործարանը վերսկսել է իր աշխատանքը։ Այս մասին հայտնել է Արգենտինայի դաշնային պլանավորման, պետական ներդրումների եւ ծառայությունների նախարարությունը։
«Մի քանի ամսից մենք այս գործարանի օգնությամբ կարտադրենք սեփական վառելիքը»,- գործարանի վերագործարկման միջոցառումների ժամանակ ասել է Արգենտինայի նախագահ Քրիստինա Ֆերնանդես դե Քիրշները։ Նրա խոսքով՝ գործարանում օգտագործվելու է ուրանի հարստացման լազերային տեխնոլոգիա, փոխանցում է ՏԱՍՍ-ը։
Նախագահն ընդգծել է, որ վառելիքն օգտագործվելու է բացառապես խաղաղ նպատակներով։ Պլանավորվում է, որ գործարանը հարստացված ուրան կմատակարարի Արգենտինայի տարածքում գործող ԱԷԿ-երին։