Թուրքական ավիացիայի կողմից թուրք-սիրիական սահմանին ռուսական «Սու-24» ռմբակոծիչը խոցելու պատճառը Թուրքիայի նախագահ Ռեջեփ Թայիփ Էրդողանի անհաշտություն է: Նման տեսակետ է հայտնել Սիրիայի նախագահ Բաշար Ասադը՝ չեխական հեռուստաընկերությանը տված հարցազրույցում, որի տեքստը մեջբերում է սիրիական պետական ՍԱՆԱ գործակալությունը:
Սիրիայի առաջնորդի խոսքով, Էրդողանի նյարդերը տեղի են տվել, քանի որ Ռուսաստանի միջամտությունը փոխել է հավասարակշռությունը ցամաքի վրա: «Էրդողանի ձախողումը Սիրիայում, նրա ահաբեկչական խմբավորումների ձախողումը նշանակում է նրա քաղաքական մահը»,-ընդգծել է Ասադը՝ հավելելով, որ Էրդողանի արարքը միեւնույն է չի փոխի ուժերի հարաբերակցությունը:
«Ահաբեկչության դեմ պայքարը շարունակվում է, ռուսական աջակցությունն էլ ավելի ուժեղ կլինի»,-վստահ է Ասադը:
Սիրիայի նախագահը նկատել է, որ ողջ ժամանակահատվածում, երբ կոալիցիոն ուժերն ԱՄՆ-ի գլխավորությամբ օդային գործողություններ էին իրականացնում ԻՊ-ի դեմ, վերջինիս դիրքերը գնալով ընդլայնվում էին: Իսկ Ռուսաստանի ռմբակոծությունների արդյունքում, հակառակը, կրճատվում են, այդ թվում մյուս բոլոր խմբավորումների դիրքերը:
Ասադի խոսքով, ահաբեկիչներին զենքի, փողի ու այլ ապրանքների մատակարարումները կատարվում են Թուրքիայի տարածքով՝ Սաուդյան Արաբիայի եւ Կատարի աջակցությամբ: Ասադը համոզմունք է հայտնել, որ ահաբեկչությունը հաղթելու համար անհրաժեշտ է փակել մատակարարման ուղիները:
Խոսելով ընդդիմության մասին, Ասադը նշել է, որ իրական ընդդիմություն կարող է ձեւավորվել միայն երկրի ներսում, իսկ Ֆրանսիայում, Կատարում, Սաուդյան Արաբիայում, ԱՄՆ-ում կամ Մեծ Բրիտանիայում ձեւավորված ընդդիմությունը հայրենասիրական չէ: Ինչ վերաբերում է զինված խմբավորումներին, ապա դրանք ահաբեկիչներ են, հավելել է Սիրիայի նախագահը:
Հարցին, թե ինչպիսին է տեսնում Սիրիան 10 տարի անց, Ասադը պատասխանել է, որ գլխավոր նպատակն ահաբեկչության դեմ պայքարում հաղթանակն է եւ աշխարհիկ բազմազան հասարակության պահպանումը:
Ինչ վերաբերում է իր ճակատագրին, նա նշել է, որ կանի այնպես, ինչպես կցանկանա սիրիացի ժողովուրդը: