Սեպտեմբերի 1-ին, ժամը 14.00-ին, ոստիկանության Հրազդանի բաժնում Նվեր Ա.-ից հաղորդում է ստացվել, որ գիշերը, պատուհանը բացելով` իրեն պատկանող խանութից գողացել են 450.000 դրամ, ծխախոտ, կոնյակ եւ այլ ապրանքներ` պատճառելով 2.000.000 դրամի նյութական վնաս:
Ոստիկանության մամուլի ծառայությունից NEWS.am-ին հայտնում են, որ ձեռնարկված օպերատիվ-հետախուզական միջոցառումների շնորհիվ պարզվել է, որ գողությունը կատարել են ապօրինի զենք-զինամթերք պահելու համար սեպտեմբերի 2-ին բերման ենթարկված, 27-ամյա Էդվարդ Բ.-ն եւ 26-ամյա Էդգար Գ.-ն:
Պարզվել է նաեւ, որ նրանք նախկինում կատարել են նմանատիպ մի քանի գողություններ եւս: Այսպես.
- 2009 թ. դեկտեմբերին պատուհանը բացելով` Սեբաստիայի փողոցում գտնվող մի բնակարանից գողացել են կենցաղային իրեր` պատճառելով 2.500.000 դրամի նյութական վնաս,
- 2010 թ. մայիսի կեսերին Կենտրոն թաղամասի 33 շենքի 1-ին հարկում գտնվող, Սարգիս Գ.-ին պատկանող խանութի պատուհանը կոտրելով` գողացել են 350.000 դրամ, ծխախոտ եւ ոգելից խմիչքներ` պատճառելով 850.000 դրամի նյութական վնաս, իսկ մի քանի օր անց փորձել են կոտրել 1962 թ. ծնված Համբարձում Վ.-ի բնակարանի մուտքի դռան փականը, սակայն իրենց կամքից անկախ հանցագործությունն ավարտին չեն հասցրել,
- հուլիսի սկզբներին Կենտրոն թաղամասի թիվ 20 շենքի 1-ին հարկում գտնվող, Համբարձում Վ.-ին պատկանող խանութի պահեստի պատուհանի երկաթյա ճաղավանդակը պոկելու միջոցով գողացել են 1.500.000 դրամ եւ 15.000 դրամ ընդհանուր արժողության ծխախոտ:
Գողոնը մասամբ առգրավված է: Էդվարդ Բ.-ն եւ Էդգար Գ.-ն ձերբակալված են: Կատարվում է նախաքննություն:
