«Ժառանգություն» կուսակցության առաջնորդ, «Նոր Հայաստան» հանրային փրկության ճակատի խորհրդի անդամ Րաֆֆի Հովհաննիսյանը թիվ 10/06 ընտրատեղամասում ցուցադրաբար պատռել է քվեաթերթիկով ծրարը եւ գցել քվեատուփը՝ հայտարարելով՝ «Հանուն Հայաստանի Հանրապետության»:
Լրագրողների հետ զրույցում նա իր քայլը հիմնավորել է նրանով, որ ընդդիմության շարքերում չկար միասնություն, եւ այն չի ձեւավորվել նաեւ բողոքի առնչությամբ:
«Ցավոք սրտի ընդդիմադիր շատ հարգելի գործընկերներս չկարողացան ընդհանուր հայտարար գտնել, շատ հստակ ձեւով ասել, թե ինչ ենք առաջարկում, մեկը ակտիվ «ոչ» է, մեկը բոյկոտ է, երկուսն էլ հարգելի են», – ասաց նա, հավելելով, որ ինքը որոշել է չբռնանալ քաղաքացիների կամքի վրա, ով ինչպես ուզում է թող իր մերժումը արտահայտի այս ռեժիմին, վարչակարգին եւ կուսակցապետության վտանգին։
«Ես որոշեցի ներկայանալ եւ հանուն մեր հանրապետության ապագայի ուղղակի իմ բողոքը արտահայտել եւ պատռել կուսակցապետության դեմքը եւ ծրարը», – ասել է նա։