Հայաստանում սահմանադրական բարեփոխումների հանրաքվեում ընտրությունը կատարվել է օրինական, ժողովրդի կամարտահայտումը կատարվել է։ Այս մասին դեկտեմբերի 7-ին կայացած մամուլի ասուլիսի ժամանակ ասել է ԱՊՀ դիտորդական առաքելության անդամ, ՌԴ Դաշնային ժողովի Պետդումայի պատգամավոր Նիկոլայ Արեֆեւը։
Նրա խոսքով՝ ԱՊՀ դիտորդական առաքելությունն ուշադիր ուսումնասիրել է Հայաստանի Ընտրական օրենսդրությունը, որը հանրային վերահսկողություն է ապահովում։ «Եվ մենք դրանում համոզվեցինք ընտրատեղամասերում։ Ուզում եմ ասել, որ անձամբ ես եղել եմ 15 ընտրատեղամասերում։ Մենք ո՛չ ընտրողների, ո՛չ ընտրական հանձնաժողովի կողմից օրենսդրության խախտման դիտողություններ չենք նկատել»,- ընդգծել է Արեֆեւը։ Պետդումայի պատգամավորի համոզմամբ՝ ամեն բան հանգիստ է եղել։ «Եվ հավանաբար այն արդյունքը, որը ցույց է տվել հանրաքվեն, հենց հայ ժողովրդի կամարտահայտման արդյունքն է»,- հավելել է Նիկոլայ Արեֆեւը։
Մամուլի ասուլիս մեկ այլ մասնակից, ՌԴ Դաշնային ժողովի Պետդումայի պատգամավոր Հովհաննես Օհանյանն իր հերթին նշեց, որ որեւէ դիտողություն՝ անգամ ոչ էական, չկա։ «Քվեարկությունն ընթացել է նորմալ մթնոլորտում, ինչն իրոք թույլ է տալիս մարդկանց իրենց տեսակետն արտահայտել նախատսված փոփոխությունների հարցում»,- նշել է Հովհաննես Օհանյանը։
Նշենք, որ դեկտեմբերի 7-ին վաղ առավոտյան ԿԸՀ նախագահ Տիգրան Մուկուչյանը հայտնել է, որ հանրաքվեի քվեարկության ժամանակ «Այո» է քվեարկել ընտրողների 825 851 ընտրող (63,35 տոկոսը), «Ոչ»՝ 421600 ընտրող (32,35 տոկոսը):
Անվավեր քվեաթերթիկների թիվը կազմում է 53 332, անճշտությունների թիվը՝ 824:
