Շվեդիայի Սյոդերթելիե քաղաքում անցած տարվա հոկտեմբերին օծված «Սուրբ Մարիամ Աստվածածին» առաջին հայկական եկեղեցին է Սկանդինավյան երկրներում: Այս մասին NEWS.am-ի թղթակցին ասաց Սկանդինավիայում Կենտրոնական Եվրոպայի հայրապետական պատվիրակի փոխանորդ տեր Եղիշե Վարդապետ Ավետիսյանը:

«Համայնքը կարողացավ ձեռք բերել իր սեփական եկեղեցին, որի շուրջ համախմբված համայնքը ջանք չխնայեց՝ հայկական եկեղեցաշինության շունչ տալու շվեդական ճարտարապետության կանոնների համաձայն կառուցված եկեղեցուն, մասնավորապես Սուրբ Խորանի կառուցումը, սրբապատկերները, Մկրտության ավազանն ու Ցեղասպանության 100-րդ տարելիցում երկինք խոյացած խաչքարը, որը պետք է միշտ հիշեցնի մեր տառապյալ ազգի անցյալն ու լուսավոր ապագան»,- ասաց տեր Եղիշեն:

Վարդապետի խոսքով՝ եկեղեցին միշտ ամեն կիրակի մատուցում է Սուրբ պատարագ, ինչպես նաեւ մկրտություններ, պասակադրություններ եւ հոգեհանգիստներ. «Յուրաքանչյուր կիրակի պատարագից հետո նաեւ հյուրասիրություն ենք կազմակերպում: Շվեդական այս քաղաքն արդեն ունի հյուրասեր համայնք: Դա են վկայում նաեւ համահայկական մշակութային միջոցառումները, որը կազմակերպվում են Շվեդիայի հայության համար»:

Նշենք, որ Սոդերթելյեում բնակվում է մոտ 1000 հայ: