Սահմանադրական փոփոխությունների հանրաքվեի օրը տեղի ունեցած խախտումների եւ կեղծիքների վերաբերյալ մի քանի օր առաջ իրավապահ մարմինների երեք ղեկավարների հրավիրած ասուլիսը ՀՔԱ Վանաձորի գրասենյակի ղեկավար Արթուր Սաքունցը կեղծիք է համարում:
«Ես դա համարում եմ ուշացած, ես դա համարում եմ կեղծիք, աչքակապություն եւ իրենց անգործության փաստ: Այդպիսի զանգվածային միջոցառման առանձին էպիզոդներով առանձին քննություն տանելու միջոցով փորձ է արվում ամբողջ կազմակերպված հանցագործության էությունը կոծկել»,-հայտարարել է Արթուր Սաքունցը:
Նրա խոսքով, իրավապահներն առաջին հերթին պետք է քրեական հետապնդում իրականացնեն Սերժ Սարգսյանի նկատմամբ, որը չսպասելով ԿԸՀ-ի կողմից նույնիսկ ձեւական պաշտոնական տվյալների հաղորդմանը, միանգամից հայտարարեց, որ հանրաքվեն կայացած է:
Ինչ վերաբերում է ՀՀ վարչապետ Հովիկ Աբրահամյանի այն հայտարարությանը, թե խախտումների վերաբերյալ հրապարակված բոլոր տեսանյութերը մոնտաժված են, իրավապաշտպանն ասել է. «Այո»-ի շտաբի ղեկավարն, ամենայն հավանականությամբ շատ լավ տիրապետում է մոնտաժման արվեստին, այնպես, ինչպես մոնտաժեցին հանրաքվեն: Ուրիշ այլ գործիքի եւ մեթոդոլոգիայի չի տիրապետում»: