Այցելությամբ Ադրբեջանում գտնվող ԱՄՆ պետքարտուղարի եվրասիական հարցերով տեղակալի օգնական Թինա Քեյդենաուն հանդիպել է Ադրբեջանի ժողովրդական ճակատ կուսակցության ղեկավար Ալի Քերիմլիի, «Մուսավաթ» կուսակցության ղեկավար Իսա Ղամբարի եւ «Ումիդ» կուսակցության նախագահ Իգբալ Աղազադեի հետ:
Ինչպես ադրբեջանական APA գործակալությունը հայտնել է Աղազադեն, հանդիպման ժամանակ քննարկման առարկան եղել է Ադրբեջանում տիրող հասարակական քաղաքական իրավիճակը, ժողովրդավարական ընտրությունների անցկացման սկզբունքները, կուսակցությունների վերաբերմունքն ընտրություններին, ընդդիմության մասնակցությունը դրանց, «Հավաքների ազատության մասին» օրենքը, ընտրական օրենսգրքի պահանջներին հետեւելը, քարոզչության համար համար հեռուստատեսությամբ ժամ տրամադրելը եւ այլ հարցեր: Քննարկվել է նաեւ Հարավային Կովկասում ստեղծված ընդհանուր իրավիճակը:
Այսօր ավելի վաղ Քեյդենաուն հանդիպել է Ադրբեջանի նախագահ Իլհամ Ալիեւի հետ: Այդ հանդիպման ժամանակ կարծիքներ են փոխանակել ԱՄՆ-ի եւ Ադրբեջանի միջեւ երկկողմ հարաբերությունների, ԼՂ խնդրի կարգավորման բանակցային գործընթացի եւ մի շարք այլ խնդիրների շուրջ:
