Ռուսաստանը հույս ունի, որ Հայաստանն ու Ադրբեջանը կկարողանան Լեռնային Ղարաբաղի հակամարտության կարգավորման սկզբունքների վերաբերյալ առարկայական երկխոսություն սկսել: Այդ մասին հայտնել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշեւիչը:
«Մենք այնուամենայնիվ հույս ունենք, որ կողմերը առարկայական երկխոսություն կսկսեն հակամարտության կարգավորման սկզբունքների վերաբերյալ», - ասել է Լուկաշեւիչը, տեղեկացնում է «ՌԻԱ Նովոստին»:
Նա նաեւ ասել է, թե Հայաստանի եւ Ադրբեջանի նախագահների վերջերս կայացած հանդիպումը հակամարտության կարգավորման «զգալի տեղաշարժ» է:
Հիշեցնենք, որ դեկտեմբերի 19-ին Բեռնում տեղի է ունեցել Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հանդիպումը:
Հանդիպման արդյունքում ԵԱՀԿ ՄԽ-ի համանախագահները տեղեկացրել են, որ Հայաստանի եւ Ադրբեջանի նախագահներն աջակցություն են հայտնել ԵԱՀԿ Մինսկի խմբի համանախագահների աշխատանքին հայ-ադրբեջանական շփման գոտում ուժային գործողությունների ռիսկի կրճատման առաջարկների, ինչպես նաեւ միջադեպերի հետաքննության մեխանիզմների ստեղծման ուղղությամբ: