2015 թ. ընթացքում որոշակի առաջխաղացում է նկատվել Ռուսաստանից Հայաստան ներկրման տեսակետից: Այս մասին դեկտեմբերի 24-ի մամուլի ասուլիսի ժամանակ հայտնել է Հայաստանի գործատուների միության նախագահ Գագիկ Մակարյանը:
Նրա խոսքով Եվրասիական տնտեսական միությունում ձգտելու են առեւտրի ազատական ռեժիմի: «Այսինքն Մաքսային միությանը անդամ երկիրների միջեւ հնարավորինս շատ են խրախուսելու փոխադարձ առեւտուրը: Կա ենթադրություն, որ երրորդ երկրների նկատմամբ քվոտավորման որոշակի ռեժիմներ կկիրառվեն: Հայաստանն այս հարցում խնդիր ունի, քանի որ մեր երկրի ներմուծման ծավալում ամենամեծ տեղը Եվրամիության երկրներն են զբաղեցնում»,- նկատել է Գագիկ Մակարյանը:
Այդ տեսակետից, շարունակեց նա, շատ տեղին է, որ Հայաստանը ԵՄ շրջանակում սկսում է մեր երկրում հավաքման արտադրությունների խրախուսման ծրագիր: «Կարծում եմ, որ շատ լավ տարբերակ կլինի Հայաստանի համար, եթե մենք կարողանանք հավաքման արտադրությունները զարգացնել ու եվրոպական կիսաֆաբրիկատների հիմքով ստեղծել արտադրություն, որը կհամապատասխանի եվրոպական որակին: Բայց ավելի էժան կլինի, քանի որ հայկական աշխատուժն էժան է ու հարկերն էլ շատ ավելի ցածր, հետեւաբար այդ ապրանքները կարող են մրցունակ լինել ԵՏՄ երկրներ արտահանելու համար»,- ասել է Հայաստանի գործատուների միության ղեկավարը:
