Սաուդյան Արաբիայի իշխանությունները զինծառայողների են ուղարկել Էլ-Քաթիֆ քաղաք՝ ճնշելու բողոքի ցույցերը, որոնք սկսվել են շիա քարոզիչ, այաթոլա Նիմր ան-Նիմրի մահապատժից հետո: Այս մասին գրում է «Վեդոմոստի»-ն՝ վկայակոչելով իրանական Fars լրատվական գործակալությունը:
Հունվարի 2-ին զանգվածային ցույցեր են անցնում թե՛ ան-Նիմրի հայրենի քաղաք Էլ-Քաթիֆում, թե՛ Սաուդյան Արաբիայի արեւելքի մյուս շրջաններում, որոնց բնակչությունը գերազանցաբար շիաներ են:
Ավելի վաղ Սաուդյան Արաբիայի ներքին գործերի նախարարությունը հայտնել էր ահաբեկչության մեղադրանքով դատապարտված 47 մարդու մահապատժի իրականացման մասին: Մահապատժի ենթարկվածների թվում էր շիա քարոզիչ ան-Նիմրը: Այաթոլան այն շարժման ակտիվ մասնակիցներից էր, որը պայքարում էր թագավորության հպատակներին ավելի լայն ազատություններ տրամադրելու, սահմանադրական բարեփոխումներ իրականացնելու համար եւ հանդես էր գալիս կրոնական փոքրամասնությունների հետապնդումների դեմ: Տարբեր երկրների շիա քաղաքական գործիչները դատապարտել են ան-Նիմրայի մահապատիժը: Մերձավոր արեւելքի տարբեր երկրներում բողոքի ցույցեր են անցկացվել:
