Հայաստանի օդային տարածքը կարեւոր տարանցիկ կետ է Եվրոպայի եւ Ասիայի միջեւ։ Այս մասին հունվարի 12-ին՝ Հայաստան կատարած աշխատանքային այցի շրջանակներում «Զվարթնոց» օդանավակայանում կայացած մամուլի ասուլիսի ժամանակ, ասել է Eurocontrol-ի գլխավոր տնօրեն Ֆրանկ Բրենները։

Eurocontrol-ի ղեկավարության տակ գտնվող տարածքում իրականացվում է օրական 31 հազար թռիչք կամ տարեկան 10 մլն։ 2035թ. այդ թիվը կարող է հասնել 14 մլն-ի։
«Բիզնեսմ աճում է, բայց ավիացիոն տարածքը բնականաբար ոչ։ Այդ պատճառով մենք պետք է տեղավորենք մեծ օդանավեր եւ իհարկե չմոռանանք անվտանգության մասին»,- ասել է Բրենները։ Նրա խոսքով՝ Հայաստանը կարեւոր տարանցիկ օդային կետ է Եվրոպայի եւ Ասիայի միջեւ եւ ավիացիոն հսկողության բնական գործընկեր։

Eurocontrol-ը Եվրոպայում թռիչքների անվտանգությունը վերահսկող միջպետական կազմակերպություն է , որտեղ ներկայացված է 41 երկիր։ Հայաստանը կազմակերպությանը միացել է 2006թ.։