Սեպտեմբերի 12-ին Հայաստանի Աժ նախագահ Հովիկ Աբրահամյանն ընդունել է ԱՄՆ պետքարտուղարի եվրոպական եւ եվրասիական հարցերով տեղակալի օգնական Թինա Քեյդենաուին:
ԱԺ նախագահը բարձր է գնահատել Հայաստանի եւ ԱՄՆ-ի միջեւ առկա հարաբերությունների մակարդակը եւ շնորհակալություն հայտնել ԱՄՆ-ի կողմից տարբեր ոլորտներում ցուցաբերվող աջակցության համար: Հովիկ Աբրահամյանը պատրաստակամություն է հայտնել որպես խորհրդարանի նախագահ աջակցել հայ-ամերիկյան հարաբերությունների հետագա ամրապնդմանն ու զարգացմանը:
ԱՄՆ պետքարտուղարի եվրոպական եւ եվրասիական հարցերով տեղակալի օգնականը եւս բարձր է գնահատել Հայաստանի եւ ԱՄՆ-ի միջեւ հարաբերությունների մակարդակը` ակնկալելով, որ համագործակցությունը կշարունակվի: Այդ գործընթացում նա կարեւոր է համարել խորհրդարանի դերը: Թինա Քեյդենաուի կարծիքով` հայ-ամերիկյան հարաբերությունները կշարունակեն դրական զարգացումներ ունենալ, եւ ԱՄՆ պետքարտուղար Հիլարի Քլինթոնի` վերջերս Երեւան կատարած այցը ազդանշան էր, որ ԱՄՆ-ը պատրաստակամ է զարգացնել երկկողմ հարաբերությունները Հայաստանի հետ: ԱՄՆ-ը ակնկալում է շարունակել գործակցությունը տարբեր ոլորտներում, տարածաշրջանային խնդիրների, ԼՂ հարցի շուրջ:
Զրուցակիցներն անդրադարձել են ԼՂ հարցի կարգավորմանը: Հովիկ Աբրահամյանը նշել է, որ Հայաստանը հավատարիմ է հարցի խաղաղ կարգավորմանը բանակցությունների միջոցով, ԵԱՀԿ Մինսկի խմբի շրջանակներում, եւ ողջունել ԱՄՆ-ի ջանքերն այդ ուղղությամբ:
Թինա Քեյդենաուն համամիտ է եղել, որ բանակցությունները պետք է ընթանան ԵԱՀԿ Մինսկի խմբի շրջանակներում, եւ հարցն այլ ատյաններում բարձրացնելը չի կարող օգտակար լինել կարգավորման գործընթացի համար:
Անդրադարձ է կատարվել նաեւ օրենսդրական բարեփոխումներին, տարածաշրջանային անվտանգության խնդիրներում խորհրդարանների դերին: