Թուրքիան այսօր տոնում է ժողովրդավարության հաղթանակը: Այդ մասին հայտարարել է Թուրքիայի վարչապետ Ռեջեփ Թայիփ Էրդողանը՝ հանդես գալով հանրաքվեի նախնական արդյունքների հրապարակումից հետո:
CNN Turk-ի փոխանցմամբ, վարչապետն ասել է, որ հանրաքվեին փոփոխությունների օգտին քվեարկել է 58 տոկոսը, եւ դա Թուրքիայի ժողովրդի հաղթանակն է: Էրդողանը նշել է, որ բնակչության 77 տոկոսը մասնակցել է հանրաքվեին, եւ հաղթել են ինչպես «կողմ», այնպես էլ «դեմ» քվեարկածները:
Ինչպես ավելի վաղ հայտնել էր NEWS.am-ը, կառավարող «Արդարություն եւ զարգացում» կուսակցությունը 26 փոփոխություն էր առաջարկել՝ թուրքական սահմանադրությունը եվրոպական չափորոշիչներին մոտեցնելու համար: Ընդդիմությունը պնդում է, որ փոփոխությունների ընդունումը վերացնում է դատական համակարգի անկախությունը եւ ապագայում կարող է հանգեցնել իսլամիստների բռնապետության:
Հանրաքվեն Թուրքիայում անցել է հանրաքվեն բոյկոտողների զանգվածային ձերբակալությունների ֆոնին:
