«Գազպրոմը» Վրաստանին վերջնագիր է ներկայացրել: Այդ մասին հայտնել է էներգետիկայի նախարար Կախա Քալաձեն «Ռուսթավի 2»-ի եթերում:
Նրա խոսքով, վրացական կողմը կտրական անհամաձայնություն է հայտնել «Գազպրոմի» պահանջին, որ Վրաստանը գազի տարանցման արժեքը ստանա ոչ թե հումքով, այլ փողով, բայց ռուսական ընկերությունը բացահայտորեն ակնարկել է, որ հակառակ դեպքում Հայաստանին գազով կապահովի Իրանի միջոցով:
«Գազպրոմն» առաջարկել է անցնել ֆինանսական վճարման, դուք գիտեք, որ գազի անցնող ծավալի 10 տոկոսը մնում է Վրաստանում, մենք դա ստանում ենք որպես հումք: Իհարկե մեզ համար դա նորություն էր: Երբ նրանք նման պայման դրեցին, մենք կտրական անհամաձայնություն հայտնեցինք, սակայն հանդիպմանը մեզ ասացին, որ Ռուսաստանը Իրանով Հայաստանին գազ մատակարարելու ռեալ հնարավորություն ունի. հնարավոր է, որ առաջին տարում դժվար լինի մատակարարել ամբողջ ծավալը, սակայն հետագա տարիներին «Գազպրոմը» կօգտվի նման տեխնիկական հնարավորությունից: Հետեւաբար, մենք նախարարությունում վերլուծեցինք, թե որքան իրական է նրանց ներկայացրած վերջնագիրը եւ պարզեցինք, որ այսօր «Գազպրոմը» կարող է Հայաստանին Իրանի միջոցով մատակարարել մոտ 1 մլրդ խորանարդ մետր գազ, բայց որոշ ներդրումների իրականացումից հետո կկարողանան ամբողջությամբ բավարարել հայկական շուկան: Այդ սպառնալիքը, բնականաբար, կա եւ մեզ համար եւ էներգետիկ տեսանկյունից դրա հետեւանքները շատ ծանր կլինեն», - նշել է Կախա Քալաձեն: