Պաշտոնական տվյալներով, մայրաքաղաքի բնակարանների գները՝ դրամով արտահայտված, վերջին տարիներին գրեթե չեն փոխվել: Ընդ որում զարմանալի «կայունությամբ» է աչքի ընկել Կենտրոն էլիտար թաղամասի 1 քառ մետրի գինը, որն արդեն մի քանի տարի է չի շեղվում 428 հազար դրամից:

Սակայն Հայաստանի արժութային շուկայում դոլարի ամրապնդումը փոփոխություններ է մտցրել անշարժ գույքի արժեքում: Եթե այդ «կայուն» գները արտահայտենք համաշխարհային արժույթի փոխարժեքով, ապա հստակ նկատելի կդառնա, որ դրանք անկում են ապրել:

Հավելենք, որ ասենք բնակարանի գնորդական պահանջարկում աճով չի գրանցվել: Հակառակը, անված տարված հունվար – սեպտեմբեր ժամանակահատվածի տվյալներով  բնակարանների ու առանձնատների առքուվաճառքի գործարքների քանակն ընդհանուր առմամբ հանրապետությունում կրճատվել է: Նկատենք, որ Հայաստանի բնակարանների խոշորագույն շուկան մայրաքաղաքում է:

Այս երեւույթները խնդրել ենք մեկնաբանել Վարդան Ավագյանին՝ Երեւանի կենտրոնում անշարժ գույքի հարցերում մասնագիտացած «Կասկադ ռիելթի» անշարժ գույքի հանրահայտ գրասենյակի տնօրենին: Փորձագետը նշեց, որ 2008-2012 թթ. գնորդական պահանջարկում անկում էր նկատվում: Հետո բնակարանի շուկայում իրավիճակը կայունացել էր ու նույնիսկ գնորդական պահանջարկի աճ էր նկատվել: Բայց այդ դրական տեղաշարժը երկար չի տեւել:

Ինչպես հայտնի է, 2014 թ. դեկտեմբերի 15-ից ( որը պատմության մեջ մտել է որպես «սեւ երկուշաբթի») սկսվել է ռուսական ռուբլու անկումը, ինչը բացատրվում էր նավթի համաշխարհային գների՝ բարելի դիմաց 70 դոլարից ցածր իջնելու ազդեցությամբ: Բայց ի՞նչ առնչություն ունի ռուսական ռուբլու փոխարժեքը Երեւանի էլիտար կենտրոնի բնակարանների գների հետ: Պարզվում է, որ ամենաանմիջական:

Բանն այն է, որ հայաստանյան գնորդներից բացի անշարժ գույք են ձեռք բերում նաեւ մեր սփյուռքի ներկայացուցիչները: Նրանց շրջանում հատկապես մեծ պահանջարկ ունեն քաղաքի էլիտար կենտրոնի բնակարանները: Վարդան Ավագյանի կարծիքով, Երեւանի կենտրոնում բնակարանների գնորդական պահանջարկի զգալի մասը ( մոտավորապես 65-75 տոկոսը) հենց արտաքին պահանջարկով է ներկայացված, որի մոտավորապես կեսը բաժին է ընկնում Ռուսաստանին:

Ռուսական «սեւ երկուշաբթիի» հետեւանքները, արդեն անցած տարվա գարնանն ազդել էին մեր անշարժ գույքի շուկայի վրա: Մասնավորապես կրճատվել էր Ռուսաստանից բնակարանների պոտենցիալ գնորդների կոնտինգենտը: Այս մասին մասնագետի դատողությունների հիմքում  անշարժ գույքի գրասենյակին այդ երկրի գնորդների կողմից ներկայացված դիմումների դինամիկան է:

Սմբատ Գրիգորյան