Չինաստանի արեւելյան Շանդուն նահանգում փրկարարները փլատակներից դուրս են բերել 4 հանքափորների, որոնք այնտեղ են մնացել 36 օր, հաղորդում է «Սինհուան»: Բժիշկների խոսքով, հանքափորները լուրջ վնասվածքներ չեն ստացել եւ կարող են արդեն փետրվարի սկզբին տուն գնալ:
Գիպսի հանքը փլուզվել էր նախորդ տարվա դեկտեմբերի 25-ին, որտեղ այդ պահին գտնվում էր 29 հանքափոր: Նրանցից 11-ին կարողացել էին դուրս բերել: Մեկ մարդ մահացել էր, եւս 13-ը համարվում էին անհետ կորած, հաղորդում է Gazeta-ն:
Շուրջօրյա փրկարարական գործողությանը մասնակցել է ավելի քան հազար մարդ: Նրանց գործողություններին խանգարում էր անկայուն երկրաբանական շերտը, շմոլ գազի հնարավոր արտահոսքն ու ջուրը: Հանքափորներից 4-ը գտնվում էին ավելի քան 200 մետր խորության տակ:
Ողջ մնացած հանքափորներին դուրս բերելու համար փրկարարները երկու թունել են փորել: Նշվում է, որ այդ տեխնոլոգիան Չինաստանում առաջին անգամ էր կիրառվում:
