Վրաստանի պաշտպանության նախարար Թինաթին Խիդաշելին հրաժարվել է մեկնաբանել Եվրոպայի խորհրդի խորհրդարանական վեհաժողովում (ԵԽԽՎ) հակահայկական զեկույցների վերաբերյալ վրացական պատվիրակության քվեարկությունը: (ֆոտոռեպորտաժ)
Այսօր՝ փետրվարի 1-ին, Հայաստանի ՊՆ-ում տեղի ունեցած բրիֆինգի ժամանակ վրացի նախարարը հիշեցրել է, որ ինքն արդեն պատգամավոր չէ, ուստի չի կարող մեկնաբանել նախկին գործընկերների որոշումը:
«Սակայն կարող եմ ասել, որ որոշումների վիճակագրությունը չի խոսում այն մասին, որ հայկական եւ վրացական պատվիրակությունները գոհ են միմյանց քվեարկություններից»,-ասել է Խիդաշելին ու հավելել. «Սա քաղաքականություն է»:
Հիշեցնենք, որ ԵԽԽՎ-ում չի ընդունվել բրիտանացի պատգամավոր Ռոբերտ Ուոլթերի հեղինակած «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» զեկույցը, սակայն ընդունվել է բոսնիացի պատգամավոր Միլիցա Մարկովիչի հեղինակած «Ադրբեջանի սահմանամերձ շրջանների բնակչությունը միտումնավոր զրկված է ջրից» զեկույցը, որը վերաբերում է Սարսանգի ջրամբարին: