Երկրի բարձր պաշտոնատար անձինք արդեն առաջին անգամ չէ, որ իրենց հեռանալը բացատրում են նրանով, որ իրենց մեկ այլ՝ ավելի շահավետ աշխատանք են առաջարկել: Նման վարքագիծը ծիծաղելի է: Այս մասին ՀՀ ԱԺ-ում փետրվարի 1-ին հայտնել է ընդդիմադիր պատգամավոր Նիկոլ Փաշինյանը՝ մարդու իրավունքների նոր պաշտպանի նշանակման մասին քննարկման ժամանակ:
Նրա խոսքով, իր ասածները վերաբերում են նաեւ մարդու իրավունքների նախորդ պաշտպան Արմեն Հարությունյանին, որն այդ պաշտոնում աշխատել է 2006-2011 թթ.: Մինչեւ լիազորությունների ժամկետի ավարտը նա հայտնել էր, որ իրեն առաջարկել են դառնալ ՄԱԿ-ի մարդու իրավունքների Գերագույն հանձնակատարի Կենտրոնական Ասիայի վարչության տարածաշրջանային ներկայացուցիչը: «Նրան նշանակել էր Հայաստանի օրենսդիր մարմինը: Բայց ստացվում է, որ նրա համար Հայաստանն ու Ուզբեկստանը նույն բանն են: Իսկ եթե վաղը նրան ասեն՝ Տյումենում ասֆալտի գործ կա, որտեղ ավելի մեծ փողեր են սպասվում՝ ուրեմն ի՞նչ՝ նա այնտե՞ղ էլ կգնա: Կամ էլ 2014 թ. տարածքային կառավարման նախարարի պաշտոնից փոխվարչապետ Արմեն Գեւորգյանի հեռանալը վարչապետը բացատրեց նրանով, որ նա մասնավոր ոլորտ է գնում: Այսինքն ստացվում է, որ նա ամբողջ կյանքում պատրաստվել էր մասնավոր ոլորտում աշխատելուն, իսկ փոխվարչապետ էր դարձել, քանի որ ուրիշ գործ չուներ: Բայց հենց զանգահարեցին ու մասնավոր ոլորտ կանչեցին՝ մենեջերի աշխատանքի, նա անմիջապես հեռացավ: Եկեք այդ դեպքում բոլորս միասին մի գերէլիտար գրասենյակ գտնենք ու մեր այսպես կոչված ղեկավարությանը այնտեղ ուղարկենք՝ մենեջերներ աշխատելու: Եվ նրանք մեզանից կազատվեն եւ մենք՝ նրանցից»,- ասել է Փաշինյանը: