Հայոց ցեղասպանության միջազգային ճանաչման ուղղությամբ աշխատանքը ամսաթվերից կախված չէ: Այդ մասին այսօր՝ փետրվարի 2-ին, նշել է Հայաստանի արտգործնախարար Էդվարդ Նալբանդյանը՝ 2015 թվականն ամփոփող մամուլի ասուլիսի ժամանակ:
Հարցին, թե Ցեղասպանության 100-րդ տարելիցը նշվեց մեծ թվով միջոցառումներով եւ կշարունակվի՞ արդյոք աշխատանքը նույն տեմպով, արտգործնախարարը պատասխանել է, որ հարցը փաստացիորեն միջազգային ճանաչում է ստացել հայ ժողովրդի ջանքերի շնորհիվ: «Հետեւողական աշխատանքն ամսաթվերի հետ չի կապված: Ցեղասպանության միջազգային ճանաչման ուղղությամբ ջանքերը կշարունակվեն», - ասել է նախարարը` հավելելով, որ ապրիլին մի շարք խոշոր միջոցառումներ են նախատեսված: