Ճարտարապետության եւ շինարարության Հայաստանի ազգային համալսարանում այսօր՝ փետրվարի 2-ին, ԷՐԱՍՄՈՒՍ+ ծրագրի շրջանակներում մեկնարկել է «Բարձրագույն կրթության միջառարկայական բարեփոխումներ` տուրիզմի կառավարման եւ կիրառական երկրատեղեկատվական տեխնոլոգիաների ուսումնական» խորագրով ծրագիրը:
«Երկրատեղեկատվական տեխնոլոգիաների զարգացումը եւ դրանց ներդրումը տուրիզմի ոլորտում կնպաստի նոր բացահայտումների եւ կխթանի ոլորտի զարգացմանը: Հայաստանը գեղատեսիլ բնությամբ օժտված, հետաքրքիր եւ յուրօրինակ ճարտարապետություն ունեցող հնագույն մշակույթային ժառանգություն կրող երկիր է եւ մենք պետք է այսօր պատրաստենք միջազգային որակավորում ունեցող կադրեր, որոնք իրենց գիտելիքներով կզարգացնեն ոլորտը:
Այս տեսանկյունից առավել նշանակալի է եվրոպական եւ մեր հարեւան Վրաստանի բուհերի հետ համագործակցությունը»,-ողջունելով ներկաներին ասել է ՃՇՀԱՀ ռեկտոր` Գագիկ Գալստյանը:
Համալսարանից NEWS.am-ին հայտնում են, որ ծրագրի նպատակն է միջառարկայական բարեփոխումներ իրականացնել բարձրագույն կրթության ուսումնական ծրագրերում (մագիստրոսական մակարդակում եւ շարունակական կրթության բնագավառում), ինտեգրելով երկրատեղեկատվական տեխնոլոգիաները, որոնք կիրառելի են մշակույթային ժառանգության փաստաթղթավորման, տուրիզմի կառավարման եւ ձեռներեցության ոլորտներում:
«Նախագիծը իրականացվելու է կոնսորցիումի միջոցով, որի անդամներն են չորս եվրոպական, վեց վրացական եւ վեց հայկական գործընկերներ: Ծրագիրը կնպաստի ՀՀ-ում եւ Վրաստանում տուրիզմի զարգացմանը: Առանձնակի շնորհակալություն եմ հայտնում ՃՇՀԱՀ-ին առանց որի աջակցության այս ծրագիրը իրականություն չէր դառնա»,-Ներկայացնելով ծրագիրը ասաց ծրագրի համակարգող` Լուիս Ֆերնանդեսը (Վալենսիայի պոլիտեխնիկ համալսարան):
«Բարձրագույն կրթության միջկառավարական բարեփոխումներ` տուրիզմի կառավարման եւ կիրառական երկրատեղեկատվական տեխնոլոգիաների ուսումնական» ծրագիրի գործունեության երեք տարիների ընթացքում նախատեսվում է դասընթացների կազմակերպում համագործակցող բուհերում, ուսանողների փոխանակում, դասախոսների վերապատրաստում, երկրատեղեկատվական լաբորատորիաների հիմնում, զարգացում, նոր գործիքների համալրում: Ծրագրի ավարտից հետո կստեղծվեն նոր մագիստրոսական դասընթացներ երկրատեղեկատվական տեխնոլոգիաների եւ տուրիզմի ոլորտում, որոնց ուղղվածությունն է լինելու մարկետինգը եւ ձեռներեցությունը:
