Պետությունը պետք է փոխհատուցի ռուսական ռուբլու փոխարժեքի անկման հետեւանքով հայկական բիզնեսի կրած կորուստները։ Այս մասին Հայաստանի ԱԺ-ում փետրվարի 2-ին հայտնել է «՛Բարգավաճ Հայաստան» խմբակցության պատգամավոր, Տնտեսական հարցերով խորհրդարանական հանձնաժողովի փոխնախագահ Միքայել Մելքումյանը։
Նրա խոսքով, 2016 թ սկզբից Հայաստանում արտահանողներին փոխհատուցում են վաճառքի 10 տոկոսը, բայց օգնությունը պետք է նպատակային լինի ու արդարացնի ռիսկերը։ Եթե 2015 թ․ սկզբին ռուբլին 8․15 դրամ արժեր, իսկ հիմա՝ 6․19, դա նշանակում է, որ նրանք, ովքեր այն ժամանակ են կոնյակ արտադրել, բայց հիմա են վաճառում, նկատելիորեն տուժում են գնի մեջ։ 1000-1200 դրամ արժողությամբ մրգային կամ բանջարեղենային պահածոի մեկ տուփում կորուստը կարող է մի քանի հարյուր դրամ կազմել։ Հենց այդքան էլ պետք է փոխհատուցել։ «Քանի որ կարեւոր չէ գործարարը 100 թե 700 դրամ է կորցնում։Եթե կորցնում է՝ ուրեմն կփակի բիզնեսը։ Ուրեմն պետք է աջակցել։ Իսկ խոսքը ռուսական ռուբլու մասին է, քանի որ մեր պատրաստի արտադրանքի արտահանման մեծ մասը հենց Ռուսաստանին է բաժին ընկնում»,- նշել է Մելքումյանը։