Ցույցի ելած աղբահանները Մեքսիկայի Կուերնավակա քաղաքի կենտրոնը աղբով են լցրել: Նրանք դեպի գլխավոր վարչական շենքերը տանող ճանապարհները փակել են հսկայական աղբով եւ անվադողերով, հաղորդում է ՏԱՍՍ-ը:
Ակցիային մասնակցում է մոտ 100 մարդ: Նրանք պահանջում են իշխանություններից վճարել իրենց մի քանի ամսվա աշխատավարձի պարտքերը: Գործակալության տվյալներով, խոսքը մոտ 60 մլն պեսոյի (ավելի քան 3,2 մլն դոլար) մասին է:
Աղբահավաքման քաղաքային ծառայության ներկայացուցիչը խոստացել է շարունակել բողոքը մինչեւ պարտքի լրիվ մարումը: Ցուցարարները մտադիր են հանդիպել Կուերնավակայի քաղաքապետ կուաուտեմոկ Բլանկոյի հետ, որը մինչեւ վերջերս պրոֆեսիոնալ ֆուտբոլ էր խաղում:
