ԱԺ ՀՀԿ խմբակցության քարտուղար Գագիկ Մելիքյանն ընդունում է, որ նախկինում վարկային ծրագրերում եղել են բացթողումներ, սակայն համոզված է, որ ԱԶԲ-ի տրամադրվելիք վարկն արդյունավետ է օգտագործվելու:
Այսօր՝ փետրվարի 3-ին, խորհրդարանում «Հայաստանի Հանրապետության եւ Ասիական զարգացման բանկի միջեւ 2015 թվականի հոկտեմբերի 13-ին ստորագրված «Քաղաքային կայուն զարգացման ներդրումային ծրագիր-Ծրագիր 2» (ընթացիկ գործառնություններ) վարկային համաձայնագիրը վավերացնելու մասին հարցի մասին քննարկման ժամանակ ՀՀԿ-ական պատգամավորն ընդգծեց, որ սա լուրջ վարկային ծրագիր է եւ օգնելու է լուծել տարածաշրջանային խնդիրներ:
«Այս ծրագիրը, որով վարկ է հատկացվում Երեւանին, արդյունավետ է եւ իր արդյունավետ ավարտն է ունենալու: Վարկային արդյունավետության մասին խոսելիս՝ առաջին հերթին պետք է անդրադառնալ վերահսկողությանը: Պետք է հիշել, որ ցանկացած վարկային միջոց նախքան ստանալը բազմաթիվ քննարկումների փուլ է անցնում, եւ որեւէ ֆինանսական կառույց հենց այնպես վարկային ծրագիր չի հաստատում՝ նախապես չուսումնասիրելով իրավիճակը»,- ասաց Գագիկ Մելիքյանը:
Խմբակցության քարտուղարի խոսքով՝ վարկային այս ծրագրով աշխատատեղեր կստեղծվեն, մայրաքաղաքի տրանսպորտային կոլապսը հնարավոր է՝ մեղմվի:
Նշենք, որ այս համաձայնագրով Ասիական զարգացման բանկը կօգնի ճանապարհաշինական աշխատանքներ իրականացնել Հայաստանի այլ քաղաքներում: Ծրագրի արժեքը կազմում է 112 մլն 960 հազար դոլար է:
Առաջին եւ երկրորդ ծրագրերով Երեւանը շրջանցող մայրուղի է կառուցվում, որպեսզի հանրապետության հարավից հյուսիս կամ կառուցվող Հյուսիս-Հարավ մայրուղով տարանցմամբ Իրանից Վրաստան ուղեւորվող ծանր բեռնատարները ստիպված չլինեն մայրաքաղաք մտնել:
Ծրագրի 3-րդ տրանշը նախատեսում է ճանապարհային նախագծերի իրականացում հանրապետության այլ քաղաքներում: Հայաստանի կառավարությունն ու Ասիական զարգացման բանկն արդեն ընտրում են քաղաքները՝ նախագծման աշխատանքներ սկսելու համար:
