Ազգային ժողովի ՀԱԿ խմբակցության պատգամավոր Հրանտ Բագրատյանը համոզված է, որ Հայաստանում վարկ են վերցնում եւ գրպանում:
Այսօր՝ փետրվարի 3-ին, խորհրդարանում «Հայաստանի Հանրապետության եւ Ասիական զարգացման բանկի միջեւ 2015 թվականի հոկտեմբերի 13-ին ստորագրված «Քաղաքային կայուն զարգացման ներդրումային ծրագիր-Ծրագիր 2» (ընթացիկ գործառնություններ) վարկային համաձայնագիրը վավերացնելու մասին հարցի մասին քննարկման ժամանակ Հրանտ Բագրատյանն ընդգծեց, որ իշխանություններին այլեւս ոչ ոք չի վստահում, քանի որ պաշտոնի բարձրացում է ստանում անձը, որը օֆշորի սկանդալի մեջ է:
«Կատարյալ չէ համաձայնագիրը, սակայն անհամեմատ ավելի լավն է, քան մյուսները: Իհարկե, լավ է մտածված: Սակայն որպեսզի ես ասեմ՝ այս ծրագիրն է լավ, պարոն Արեյան ինձ պետք է ցույց տաք արդյունավետության մասին թվեր: Պետք է ցույց տաք, թե այս ծրագիրն ինչքանով է մեզ պետք, հենց հիմա եւ հենց այս նպատակով»,- ասաց Հրանտ Բագրատյանը՝ հիշեցնելով, որ «Հյսւսիս-Հարավ» ծրագրի ռազմավարությունը սխալ էր ընտրված:
Նշենք, որ այս համաձայնագրով Ասիական զարգացման բանկը կօգնի ճանապարհաշինական աշխատանքներ իրականացնել Հայաստանի այլ քաղաքներում: Ծրագրի արժեքը կազմում է 112 մլն 960 հազար դոլար է:
Առաջին եւ երկրորդ ծրագրերով Երեւանը շրջանցող մայրուղի է կառուցվում, որպեսզի հանրապետության հարավից հյուսիս կամ կառուցվող Հյուսիս-Հարավ մայրուղով տարանցմամբ Իրանից Վրաստան ուղեւորվող ծանր բեռնատարները ստիպված չլինեն մայրաքաղաք մտնել:
Ծրագրի 3-րդ տրանշը նախատեսում է ճանապարհային նախագծերի իրականացում հանրապետության այլ քաղաքներում: Հայաստանի կառավարությունն ու Ասիական զարգացման բանկն արդեն ընտրում են քաղաքները՝ նախագծման աշխատանքներ սկսելու համար: