Ոստիկանությունը նոր մանրամասներ է ներկայացրել Արարատի մարզի Նորամարգ գյուղի բնակիչ, 69-ամյա Վալերի Մուսայելյանի սպանության գործով:

Ըստ ոստիկանության՝ դեկտեմբերի 30-ին, սպանվածի արնաշաղախ դին հայտնաբերել է նրա համագյուղացի ընկերը, որը սովորության համաձայն վաղ առավոտյան եկել էր սուրճ խմելու եւ կաթ գնելու:

Մուսայելյանի ընկերը նկատել է, որ տան դարպասը եւ դուռը բաց են, իսկ ոստիկանները ավելի ուշ պարզել են, որ դուռը բացվել է ներսից՝ հետեւություն անելով, որ հանցանքը կատարածը ծանոթ է եղել սպանվածին:

Նորամարգի գյուղապետի ահազանգով սպանվածի տուն ժամանած ոստիկանության ծառայողների աչքից չի վրիպել Մուսայելյանի պարտքի ցուցակը:

Քննարկվող 8 վարկածների շրջանակը նեղացել է՝ հասնելով 2-ի: Ոստիկանները կասկածել են, որ սպանությունը հնարավոր է՝ կատարած լինի Մուսայելյանին 2 մլն. 364 հազար ՀՀ դրամ պարտք համագյուղացին եւ գյուղի էլեկտրացանցի տեսուչ, 30-ամյա Հովվհաննես Թորգոմյանը, որը խաղատուն էր հաճախում եւ խոշոր պարտքեր էր կուտակել, բացի այդ հենց դեպքի օրվանից անհետացել է  գյուղից:

Հովհաննես Թորգոմյանին հայտնաբերելու ուղղությամբ ձեռնարկված միջոցառումների արդյունքում պարզվել է, որ վերջինը գտնվում է Մարտունի քաղաքում՝ քենու տանը:

Հովհաննես Թորգոմյանը բերման է ենթարկվում, եւ ոստիկանության Մասիսի բաժնում բացատրական աշխատանքներից հետո խոստովանել է, որ սպանությունն ինքն է կատարել:

«Ասել եմ փող տուր ինձ, գնամ, ասել ա՝ բա չունեմ, ու տենց սկսել ենք քաշքշել, խփել, դանակը վերցնելու պահին ինքը բարձրացել ա, դանակը ձեռս խփել եմ»,-խոստովանել է Թորգոմյանը:

Հովհաննես Թորգոմյանը կալանավորված է: 

Նշենք, որ 69-ամյա Վալերի Մուսայելյանի դի վրա մեկ տասնյակից ավելի սուր կտրող-ծակող, ինչպես նաեւ բութ գործիքի հետքեր են հայտնաբերվել:

Ձեռք բերված ապացույցների համակցությամբ՝ 2016թ. հունվարի 11-ին, նրան մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 8-րդ կետով: Նույն օրը քննիչը միջնորդություն է ներկայացրել դատարան՝ մեղադրյալի նկատմամբ որպես խափանման միջոց կալանավորումը կիրառելու վերաբերյալ: